Kreu i Partisë Demokratike, Sali Berisha e konsideron një tragjedi të rëndë ngjarjen që ndodhi në Koçan të Maqedonisë së Veriut ku humbën jetën 59 të rinj.
Në një reagim në rrjetet sociale ai i shpreh ngushëllime familjarëve të viktimave si dhe solidaritetin me autoritetet lokale dhe qendrore të Maqedonisë së Veriut.
“Një tragjedi e rëndë në Maqedoninë e Veriut Miq, një tragjedi e rëndë ka ndodhur në vendin mik. Në një diskotekë në qytetin Koçan, Maqedonia e Veriut, 59 të rinj, të moshave 14-25 vjeç, humbën jetën tragjikisht nga zjarri, ndërsa 155 të tjerë pësuan djegie të shkallëve të ndryshme dhe helmim nga monoksidi i karbonit.
Ndër ta, 18 janë në gjendje të rëndë. Me këtë rast, shpreh ngushëllimet më të ndjera të mia dhe të Partisë Demokratike për familjet e viktimave, si dhe solidaritetin tonë me autoritetet lokale dhe qendrore të Maqedonisë së Veriut. Gjithashtu, lutemi për një shërim sa më të shpejtë dhe të plotë të të plagosurve në këtë tragjedi të tmerrshme”, shkruan Berisha.
