Partia Lëvizja e Legalitetit ka reaguar pas videomesazhit të Kryeministrit Edi Rama, duke e akuzuar atë për propagandë dhe shmangie të përgjegjësive lidhur me situatën aktuale institucionale në vend.
Në një deklaratë, PLL shprehet se Rama, në vend që të fokusohet te thelbi i zhvillimeve, është marrë me median dhe me SPAK-un, duke e cilësuar si të tepruar zbatimin e ligjit nga ky institucion.
Sipas PLL-së, deklaratat e Kryeministrit nuk mund të fshehin, siç pretendon partia, “krizën e rëndë ku gjendet shteti me institucionet e larta të sigurisë së tij”, si dhe problematikat që ajo i lidh me krimin, korrupsionin në nivele të larta qeveritare dhe gjendjen ekonomike.
“Çfarëdo që mundohet të thotë dhe të deklarojë KM Rama, ai, me manipulim dhe propagandë, nuk mund të fshehë krizën e rëndë ku gjendet shteti”, thuhet në deklaratë.
PLL thekson gjithashtu se situata nuk duhet trajtuar thjesht si një ngjarje e radhës apo si një lajm kronike, duke bërë thirrje për një reagim më të gjerë politik.
Partia u drejtohet forcave opozitare, duke kërkuar që ato të marrin, sipas saj, përgjegjësinë politike dhe të mos kufizohen vetëm në deklarata dhe akuza publike.
“Çdo faktor opozitar duhet të ngrihet në përgjegjësinë dhe misionin e vet politik dhe nuk duhet të mjaftohemi thjesht me fajësime deklarative”, përfundon deklarata e PLL-së.
Reagimi vjen në një klimë të debatit të fortë politik rreth institucioneve të sigurisë, hetimeve të SPAK-ut dhe përgjegjësive politike të qeverisë.
Deklarata e plotë PLL
Partia Lëvizja e Legalitetit
Për Partinë Lëvizja e Legalitetit, nuk pritej gjë ndryshe!
KM Rama, në vidiomesazhin e tij, vazhdoj me propogandë dhe manipulim të situatës ku ndodhet shteti duke mos mbajtur asnjë përgjegjësi, duke anashkaluar thelbin e ngjarjes dhe duke u marrë më tepër me median për çfarë ajo u mundua të zbuloj dhe SPAK-un për gjoja teprim zbatueshmërie të ligjit.
Çfardo që mundohet të thotë dhe të deklaroj KM Rama, Ai, me manipulim dhe propogandë, nuk mund të fshehi krizën e rëndë ku gjendet shteti me institucionet e larta të sigurisë së tij, nuk mund të fshehi krimin dhe korrupsionin në nivele rë larta qeveritare, nivelin e ulët ekonomik dhe çdo krizë tjetër.
Kjo situatë aktuale nuk duhet kaluar si një ngjarje e radhës apo lajm kronike, ajo na vë të gjithëve para përgjegjësive, prandaj çdo faktor opozitar duhet të ngrihet në përgjegjësinë dhe misionin e vet politik dhe nuk duhet të mjaftohemi thjeshtë me fajësime deklarative.
