Deklaratë e Kryetarit të Partisë Lëvizja e Legalitetit, Shpetim Axhami
Partia Lëvizja e Legalitetit përshëndet studentët shqiptarë që zhvilluan një protestë madhështore në qendër të Shkupit, në Maqedoninë e Veriut, ku ata kërkojnë të drejtën për gjuhën shqipe dhe dhënien e provimit të jurispodencës në këtë gjuhë.
Sipas Marrëveshjes së Ohrit, ku u vendosën bazat ligjore të përdorimit të gjuhës shqipe si gjuhë zyrtare, përdorimi i gjuhës shqipe në arsim nga shkollat e ciklit parauniversitar deri në universitete është një e drejtë ligjore e garantuar për shqiptarët në Maqedoninë e Veriut.
Kur kjo e drejtë nuk zbatohet në praktikë, reagimi qytetar është i domosdoshëm.
Protesta e sotme nuk është thjesht një protestë, ajo është thirrje për barazi, drejtësi dhe identitet kombëtar.
Mbështetja për këta studentë është mbështetje për një shoqëri më të drejtë dhe për një arsim që respekton identitetin dhe gjuhën e çdo qytetari.
