Të mërkurën, vendi ynë do të ndikohet nga kushte atmosferike të qëndrueshme, duke sjellë një ditë të qetë dhe me mot të kthjellët pothuajse në të gjithë territorin.
Sipas parashikimeve meteorologjike, kthjellimet do të jenë dominuese, ndërsa në orët e mesditës nuk përjashtohen kalime të pakta të vranësirave, kryesisht në zonat malore të jugut.
Temperaturat e ajrit do të ulen lehtë në mëngjes, por rriten në mesditë duke luhatur vlerat ditore nga 17°C vlera më e ulët në Verilindje të vendit deri në 40°C, vlera maksimale në qarkun e Elbasanit.
Era do të fryjë me drejtim veriperëndimor në verilindje, me një shpejtësi mesatare prej 5 metra në sekondë. Në lugina dhe zona bregdetare, era herë pas here mund të arrijë shpejtësi deri në 7-8 m/s.
Edhe kushtet në det do të jenë të qeta, me valëzim të lehtë që do të variojë nga 1 deri në 2 ballë.
