Formulari i dekriminalizimit, Pirro Vengu pranon se grekët duan që ai të kryejë shërbimin ushtarak
Nuk kanë fund çudirat dhe perlat në Shqipëri. Vetëm te ne ndodh që në krye të institucioneve ku ka të dhëna sekrete janë emëruar njerëz me disa kombësi. Rasti më i çuditshëm është ai i ministrit të Mbrojtjes, Pirro Vengu, i cili ka shtetësi greke.
Por kjo nuk është e gjitha. Greqia vijon ta kërkojë ende Pirro Vengun që të bëjë ushtrinë, edhe pse është ministër i Mbrojtjes në vendin tonë. Për të qenë më të qartë. Kur Pirro Vengu ishte shef kabineti në Ministrinë e Jashtme në vitin 2015, kohë në të cilën ministër ishte Ditmir Bushati, i erdhi një shkresë nga Greqia dhe i kërkohej që të shkonte ushtar. Kjo gjë shkaktoi debate të shumta në atë kohë, pasi një zyrtari shqiptar i kërkohej të shërbente për ushtrinë greke, për më tepër që ai kishte akses në të dhënat sekrete.
Por edhe pse kanë kaluar 10 vite nga ajo kohë, Vëngu vijon të kërkohet që të bëjë ushtrinë. Këtë e ka pranuar vetë ministri në Formularin e Dekriminalizimit. “Pamfleti”, ka siguruar formularin e dekriminalizimit të dorëzuar nga ana e tij në KQZ, duke qenë se kandidon në Vlorë për deputet.
Në fund të formularit ai ka bërë një shënim, ku bën me dije se Greqia ende e kërkon të kryejë shërbimin ushtarak dhe për shkak se ai nuk e ka kryer, i është kufizuar qëndrimi në shtetin helen. Sipas asaj që thotë Vengu, ai nuk mund të qendrojë atje më shumë se 30 ditë në vit. Sipas ligjit grek, shërbimi ushtarak kryehet deri në moshën 45-vjeçare, moshë të cilën Vengu nuk e ka arritur.
Pra absurdi është se Vengu ka në dorë sekrete të NATO dhe të dhëna sensitive, por ndërkohë ka shtetësi greke dhe vijon të kërkohet që të bëhet pjesë e ushtrisë së tyre. /Pamfleti
Formulari i dekriminalizimit
