Sot një ditë e trishtë për futbollin shqiptar! Kjo pasi Sefedin Braho, emër i madh i Luftëtarit, kampion me Partizanin, pjesë e Kombëtares shqiptare, është ndarë nga jeta mëngjesin e kësaj të diele.
Më shpejtësinë dhe driblimet e tij fitoi zemrat e tifozëve gjirokastritë dhe të gjithë atyre që e dashurojnë futbollin.
Sefedin Braho është përshkruar si futbollisti më i shpejtë i kampionateve shqiptare ndër vite. Një start dhe sprint si të tijin, rrallë kanë parë pistat dhe fushat e futbollit.
Ai spikati falë talentit të tij, duke qenë një prej lojtarëve më të shquar të futbollit shqiptar në vitet 70-80. Ai njihej me nofkën “shigjeta”, për shkak të shpejtësisë, elegances dhe driblimit të tij.
Në kampionatin shqiptar ka luajtur për Partizanin dhe Luftëtarin, ndërsa me ekipin përfaqësues ka zhvilluar 9 ndeshje, duke realizuar edhe një gol.
