Kuvendi voton kundër dërgimit të mandatit të deputetes Olta Xhaçka në Gjykatën Kushtetuese.
Pas një seance të gjatë, me 39 vota pro dhe 72 kundër është rrëzuar kërkesa e opozitës për mandatin e ish-ministres për Europën dhe Punët e Jashtme.
Ndërkohë Xhaçka u shpreh më herët gjatë seancës së sotme ,duke kundërshtuar akuzat e opozitës për konflikt interesi, lidhur me statusin që ka marrë bashkëshorti i saj Artan Gaçi, fillimin e vitit 2022 për ndërtimin e një resorti në jug të vendit.
Ajo deklaroi se nuk përfituar asnjë qindarkë nga trualli shtetëror dhe asnjë favorizim për shkak të postit.
“Unë dhe familja ime nuk kemi përfituara asnjë qindarkë nga fondet publike, zero! Asnjë m2 tokë publike zero! Asnjë lehtësi procedurale të ndryshme nga të gjithë të tjerët. Zero! E dini se çfarë është përfitimi nga statusi I investitorit strategjik të asistuar. Se nuk është aspak I barabartë me atë të investitorit strategjik që thoni ju.
Përfitim që në çdo rast, ligjërisht nuk i atribuohet fare drejtpërdrejt bashkëshortin tim në hoteleri që kurrë mos u bëftë, pas baltës së pamerituar që solli në jetën tonë, por kompanisë që në një të ardhme do të menaxhojë aktivitetin. Vetëm e drejta për tu trajtuar me prioritet për lidhjen e njërës prej 1500 kontratave të përvitshme të qirasë për sipërfaqen e plazhit para hotelit.
A lejohet potencialisht kur të kryhet investimi, kur të lidhet kontrata që mund të mos ndodhë kurrë, të vërë apo të mos vërë shezlong në plazh. Jam e bindur që gjysma e sallës me këtë interpretim ligjor është në papajtueshmëri të mandatit”, ka thënë Xhaçka më herët gjatë seancës së sotme.
