Tridhjetë e shtatë mikrobusë dhe automjete elektrike me një kosto prej 1.5 milionë Paund do t’i jepen Shqipërisë nga qeveria britanike, si pjesë e një marrëveshjeje për kthimin e të burgosurve shqiptarë në vendlindje.
Kjo është ajo që zbulon media britanike lidhur me marrëveshjen e shpallur në Maj, që do të bëjë që 200 shtetas shqiptarë të burgosur në Angli dhe Uells të dërgohen në shtëpi për pjesën tjetër të dënimit.
Marrëveshja pritet t’i kushtojë Ministrisë së Drejtësisë së Anglisë rreth 8 milionë Paund gjatë dy viteve, një shumë disa herë më e vogël kjo nëse të burgosurit shqiptarë do ta vuajnë dënimin në burgjet angleze.
Kjo pasi sipas zyrtarëve britanik Qeverisë së Mbretërisë, i kushton rreth 40,000 Paund në vit për të strehuar çdo të burgosur Britani. Në këmbim, qeveria e Rishi Sunak ka marrë përsipër të ndihmojë në “modernizimin” e sistemit të burgjeve shqiptare.
Detaje të reja nga kontratat e qeverisë, të publikuara këtë muaj, tregojnë se një pjesë e marrëveshjes shumëmilionëshe po shkon drejt pajisjes së shërbimit të burgjeve shqiptare me një flotë të re automjetesh.
Rreth 500,000 £ do të shpenzohen për 15 automjete elektrike, ndërsa 22 mikrobusë të rinj do t’i ofrohen shërbimit të burgjeve të Shqipërisë me një kosto prej më shumë se 1 milion Paund.
Duke shpallur marrëveshjen në Maj, Sekretari i Drejtësisë Alex Chalk tha se “publiku pret që kriminelët e huaj duhet të vuajnë dënimet e tyre jashtë shtetit – jo në burgjet tona në kurriz të taksapaguesit”.
Ai premtoi se marrëveshja “do të përshpejtojë largimin e këtyre shkelësve dhe do t’u japë viktimave besimin se kriminelët e rëndë do të vazhdojnë të përballen me drejtësinë dhe të kalojnë pjesën e mbetur të dënimit të tyre pas hekurave”.
