Nga Vehap KOLA
Trekëndëshi i Bermudës doli përfundimisht në sipërfaqe si Trekëndëshi i Sovranizmit. Pas shpalljes së sovranitetit edhe nga brinja e tretë e trekëndëshit mbrëmë përmes zëdhënësit të saj në Opinion, Shqipëria ka një skenë politike bipolare. Në njërin pol është bashkuar grupimi politik i tranzicionit 30-vjeçar, që lufton për sovranitet dhe pavarësi, veçanërisht nga ShBA. Në polin tjetër qëndron ajo pjesë e Partisë Demokratike që nuk iu nënshtrua presioneve të Foltores për t’u bërë ushtarë të lëvizjes personale të Berishës.
Poli sovranist tranizcionist, i njohur më parë si Trekëndëshi i Bermudës, nuk është unifikuar kurrë kaq hapur në qëndrimet ndaj rolit të komunitetit ndërkombëtar, e veçanërisht rolit të ShBA-ve në ndërtimin e institucioneve dhe vendosjen e sundimit të ligjit. As në 1991, as në 1994, as në 1996, as në 1997 të gjitha palët nuk janë bashkuar kaq qartë në qëndrimin sovranist ndaj Ambasadës së ShBA-ve.
Po, pse sot? Sepse asnjëherë nuk kanë patur të njëjtin hall si sot. Nuk janë përballur me të njëjtin fat siç u është parashkruar sot. Në secilin nga këto momente të tranzicionit ShBA-të janë detyruar të punojnë me palën më pak të korruptuar dhe më pak problematike për të shmangur problemin madhor.
Kësaj here, ShBA-të po tregojnë shenja lodhjeje me këtë klasë politike në tërësi. Siç duket, kanë vendosur që t’i japin fund tranzicionit dhe qeverisjes me institucione ad-hoc. Struktura e thjeshtë hierarkike e institucioneve të drejtësisë, më e ngjashme me sistemin juridik sovjetik se sa me modelin amerikan, po zëvendësohet nga një strukturë e llojit network, më e horizontalizuar dhe më autonome në veprim.
Kjo e bën më të vështirë kontrollin e drejtësisë nga një dorë, siç është qeveria. Ndonëse në etapën infantile ku është sot, sistemi vijon të jetë nën kontrollin e Edi Ramës, kjo nuk duket se do të vazhdojë gjatë. Qëndrimet e mbrëmshme të ambasadores Kim kanë hidhëruar dhe kanë xhindosur edhe brinjën e tretë të Trekëndëshit të Bermudës.
Që mbrëmë, nuk ka asnjë dallim politik dhe strategjik ndërmjet të tre brinjëve të atij trekëndëshi. Ata mund të vazhdojnë të inskenojnë teatrin e rivalitetit të rremë ndërmjet njëri-tjetrit por ajo që i bashkon është shumë e madhe që t’i lejojë ata të duken të ndryshëm edhe në sytë e publikut.
Siç u bashkuan për të “shpëtuar Shqipërinë nga financimet ruse”, ata që kanë sjellë në Shqipëri të gjithë myshterinjtë e mundshëm të Kinës dhe Rusisë, që u kanë dorëzuar sektorët strategjikë fuqive rivale me ShBA-të, do t’i shohim të paepur në garën për të thënë “ma mbaj kopilin nanë, t’ia them sa s’ma ka thanë”.
Sovranizmi i tyre hipokrit nuk ka asnjë lidhje me interesin publik dhe kombëtar të shqiptarëve. Kjo është thjesht përpjekja e tyre e korruptuar për të ruajtur pushtetin dhe kontrollin e tyre mbi pasuritë e Shqipërisë. Falë këtij manifestimi të hapur të interesit të tyre malinj, sovranizmi i tyre po shfaqet qartësisht si streha e fundit e maskarenjve.