Redaksionale
Situata politike në Shqipëri është dramatike pasi faktet e përditshme që bëhen publike dëshmojnë për krimin elektoral që ndodh në vend sot 30 vite pas rënies së komunizmit. Sëmundja e blerjes së votave dhe abuzimit me pushtetin nga ana e qeverisë janë frikësuese sidomos për një vend kandidat për të hyrë në BE. Padyshim, vendet e rajonit kanë problemet e tyre me votimin por dhunimi i tejskajshëm i lirive të zgjedhjeve është një produkt vetëm Shqiptar.
Me gjithë këtë tragjedi vëmendja e qytetarëve po shtyhet gjithnjë e më shumë në atë që po ndoh në PD. Mendojmë që ndonëse vëmendja tek PD është e rëndësishme dhe jetike për demokracinë, kryefjala edhe sytë tanë duhet të jenë të vendosur tek ajo çfarë ka ndodhur në 25 prill në Shqipëri. Demokracia është më së pari e rëndësishme në Shqipërinë tonë, përfaqësia është ë rëndësishme në parlament ku më me rëndësi është mazhoranca.
Zbulimet e fundit kanë dëshmuar që procesi i votimit ka qenë i korruptuar dhe qeveria ka përdorur mjete jo ligjore për të ndikuar në votime. Këtu nuk bëhet fjalë për abuzimin me buxhetin, shpërndarjen e parave përmes thesarit disa ditë përpara procesit të votimit, fondin prej 124 mln euro për tërmetin apo dhe legalizimet. Jo! Përpos këtyre akteve tërësisht antikushtetuese, qeveria mësohet të ketë vepruar edhe duke ndërhyrë në sistemin e zgjedhjeve. Manipulimet duke votuar mbi dy herë në procesin e votimit dëshmojnë se lista e abuzimeve ndaj procesit themel të demokracisë po bëjnë pis ditën 25 prill.
Prandaj duket tërësisht jashtë realiteti fokusimi i debatit publik tek ajo çfarë po ndodh në PD. Në të vërtetë PD, në kushtet e asaj që ndodh sot është tejet e nxituar në proceset e saj. Natyrisht ngjarjet në PD janë të një rëndësie të veçantë por fokusimi i gjithë diskursit publik në betejën e brendshme tek kjo forcë politike është përpjekja e qeverisë për të ndërtuar një narrativë të rreme.
Me gjithë problematikat e saj, PD nuk është problemi i demokracisë shqiptare dhe as zgjidhja përfundimtare i asaj që ndodh në çdo zgjedhje në Shqipëri. Nëse Shqipëria do të distancohet përfundimisht nga problemi me zgjedhjet duhet më së pari që ne të kuptojmë dhe të reflektojmë mbi realitetin e gjendjes. Ajo në shpërfaqet qartë përditë duke na treguar se në të vërtetë demokracia ka çeduar jo sepse PD nuk është aq demokratike sa duhet apo duam por sepse qeverisja ka vendosur të manipulojë vullnetin e qytetarëve.
