Kreu i Partisë Demokratike, Lulzim Basha, i ka kthyer sërish përgjigje kryeministrit Edi Rama lidhur me lapsusin në konferencën e djeshme. Sipas Bashës, kryeministri fshihet si struci pas një lapsusi, në një kohë kur vjedhja galopante, keqqeverisja, ekonomia dhe shëndetësia janë drama e vërtetë e çdo shqiptari sot.
Në një prononcim për mediat ditën e djeshme, kryedemokati Basha foli për planin me 5 pika për ekonominë të PD-së, dhe gjatë fjalës së tij tha se 6 nga 4 biznese nuk nxjerrin fitim. Nuk ka vonuar shumë reagimi i kryeministrit Edi Rama, i cili përmes një postimi në rrjetet sociale ka ironizuar deklaratën e Bashës. Rama ka thënë se Basha është artist, duke ironizuar programin, por edhe zgjedhjet në PD. Sipas kryeministrit, Lulzim Bashës nuk i kanë dalë llogaritë në rregull në asnjë rast.
Ditën e sotme, i pyetur nëse e kishte ndjekur konferencën e kundërshtari të tij politik kryeministri Rama tha se nuk i kishte ndjekur megjithatë kjo nuk e ndaloi atë të komentonte sërish lapsusin e Bashës duke thënë se nuk janë lapsuse ato që thotë kryedemokrati Basha, por është një trend kur vjen puna tek shifrat.
