Nga Red VARAKU
Nuk besoj se ka tallje më të madhe me opinionin publik sesa përpjekja për t’ia servirur shqiptarëve dështimin spektakolar të Ramës si sukses. Kjo jo për vetë përpjekjen, sesa për fyerjen e inteligjencës që mund t’i bësh, qoftë edhe një njeriu me formim elementar.
Tashmë të gjithë e kanë të qartë atë që përgjimet bënë të qartë, ndaj spërdridhet dhe i merret goja sa herë i përmenden dosjet 339 dhe 184. Jo vetëm Rama, që është një sharlatan politik i mirëfilltë, por edhe kryeministri më i suksesshëm i globit, do të rrëzohej nga ato përgjime.
Nga momenti i publikimit të tyre , Rama nuk po qeveris më. Ai është kthyer nga regjisor i qeverisjes, në një aktor të skenarit të Opozitës. Fatkeqësia qëndron në faktin se tashmë është i detyruar t’i bindet këtij skenari, sepse sa më shumë të rezistojë, aq më shumë ia bën më të lehtë punën Opozitës.
Çdo vendim që ka ndërmarrë prej momentit të daljes së përgjimeve ka rezultuar fatal jo vetëm për të , por edhe për partinë socialiste, të cilën etja për pushtet e këtij njeriu po e zhyt në një spirale të pakthyeshme drejt asgjësimit.
Edi Rama po vuan dështimin e “rilindjes” së tij, të cilën e solli në jetë nga përdhunimi që i bëri PS . Ai po tenton me çdo mjet ta mbajë gjallë artificialisht, në një përpjekje të shëmtuar për të justifikuar normalitetin me karagjozllëqe.
Sigurisht, që ai e ka të vështirë ta pranojë dështimin, dhe një delirant si ai nuk do ta pranojë kurrë, por tashmë është shumë vonë.
Shumë njerëz të ndershëm të rreshtuar pranë kësa partie nuk e kanë kaluar akoma tronditjen që zbuluan përgjimet, ku vetë kryeministrin i tyre ‘çorapekuq’ bashkë me ministrat e tij, parakalonin në përgjime zyrtare të prokurorisë me një fjalor ordiner duke organizuar bashkë me kriminelët, krimin elektoral më të përbindshëm që ka ndodhur ndonjëherë.
Gjithashtu, sondazhet tregojnë një disfatë të frikshme të PS në zgjedhje . Kjo jo vetëm për shkak të një bilanci skandaloz qeverisës dhe korrupsionit kapilar, por edhe për faktin se struktura politike e PS në bazë është në një gjendje të rrënuar, për shkak të asgjësimit të aktorëve politikë dhe zëvendësimit të tyre me antarë të bandave kriminale.
Fillimisht , gjëja më e rëndësishme që duhet të bëjë Rama dhe socialistët, është pranimi i dështimit si përgjegjësi e të gjithëve. Vetëm pas kësaj ata mund të ofrojnë edhe një plan të qartë se si do ta ringrejnë dhe rikthejnë PS në një forcë konkuruese.
Nëse nuk e kuptojnë dot këtë , do të vazhdojnë të rishpikin beteja qesharake si kjo e fundit me emër suxhuku dhe KaÇKavalli, beteja absurde me kriminelë, të cilët ata vetë i futën në sferat më të larta të pushtetit .
Pra, është koha që socialistët të ndërgjegjësohen që ky njeri me vendimet që po ndërmerr po tregon që as që do t’ia dijë për fatin e PS. Madje, me vendimin për të lënë eunukun Veliaj si pasardhës , është e qartë që ai synon të vazhdojë ta drejtojë PS edhe pasi të jetë larguar, çka do të sillte dhe fundin e sigurtë të PS, sepse do të sillte një çarje të parikuperueshme midis rilindasve dhe socialistëve.
Ndaj, është koha të reagojnë shpejt, sepse një gjë është e qartë: triniteti i korrupsionit, krimit dhe pandëshkueshmërisë është vdekjeprurës për një formacion politik dhe sa më vonë ta kuptojnë, aq më të vështirë do ta kenë të rikthehen sërish.
