Elona CASLLI
Thuhet se e tashmja ndikon tek ardhmja po aq sa e shkuara. E tashmja jonë është rrjedhojë e së shkuarës sonë dhe njëkohësisht shkak i së ardhmes sonë.
E tashmja e Shqipërisë mund të përmblidhet me një fjalë të vetme:- Autoritet absolut!
Autoriteti absolut që ushtrohet nga Rama, në thelbin e tij ka vetëm një slogan- Bindje pa fjalë!
Ne si popull kemi një të drejtë dhe një detyrë : Të mos mendojmë dhe të bindemi pa fjalë.
Detyrën e të bindurit në heshtje deri tani e kemi kryer më së miri dhe të drejtën e jomendimit nuk na e ka hequr kush.
A do të vazhdojmë ta kryejmë këtë detyrë dhe ta kemi ende këtë të drejtë në të ardhmen?!
Duke u bazuar në të tashmen tonë, kam frikë se po!
Kushdo që do të vinte në pushtet pas Edi Ramës, do të kishte ndërmend një popull që ishte bindur pa bërë fjalë përballë autoritetit absolut të Ramës.
Dhe një popull që bindet pa bërë fjalë, është krejt i rehatshëm për t’u qeverisur!
Edhe unë do të veproja si Rama, a ndoshta më keq se ai, nëse përballë vetes do të kisha jomendimin dhe bindjen e heshtur të një populli.
Thonë se njeriu e formon njeriun përmes mendimit. Duke i trajtuar udhëheqësit tanë si të paprekshëm, të pakundërshtueshëm dhe të parrëzueshëm, kemi formësuar autoritetin absolut në qeverisje.
Nëse Rama largohet pas zgjedhjeve të vitit 2021 , atëherë populli shqiptar, nga duart e një autoriteti absolut, do të kalojë në duart e një tjetri autoriteti absolut.
Ne, të bindurit e heshtur, do të këmbejmë një pronar me një tjetër dhe e ardhmja jonë do të ketë fytyrën e së shkuarës sonë.
Marrëdhëniet me një udhëheqës, apo me një tjetër jo vetëm krijohen, por edhe edukohen.
Edukohen përmes mosbindjes, përmes protestës, përmes revoltës.
Mosbindja , në sytë e kujtdo që ka lexuar histori, është virtyti origjinal i njeriut. Përmes mosbindjes ka ardhur zhvillimi, përmes mosbindjes dhe rebelimit- do të shprehej Oscar Wilde
Mosbindja është e dobishme pasi nënvizon kufijtë e pushtetit. Duke qenë i ndërgjegjshëm për ekzistencën e kufijve, çdo individ i veshur me pushtet , do të mendohej dy herë para se të merrte një vendim.
Post Scriptum- Heshtja jonë sot, do të prodhojë një Ramë tjetër nesër.
