Pak javë më parë , të gjithë fansat e “Joker” u cmendën pas trailerit të ri të këtij filmi duke u bërë kështu traileri më i shikuar për pak orë në historinë e Youtube.
Ky film i luajtur nga aktori tepër i rëndësishëm në kinematografinë amerikane, Joaquin Phoenix, do të shfaqet në kinematë amerikane këtë javë pavarësisht një vale kritikash se ai glorifikon një vrasës dhe mund të inkurajojë sulme të ngjashme kudo.
Ngjarjet zhvillohen në 1981 dhe tregohet historia e Arthur Fleck, një komedian i dështuar që gjen shpëtim duke u shndërruar në vrasës në qytetin e Gothamit. Edhe para publikimit të tij, Warner Bros, është përballur me protesta të familjeve të viktimave që druanin se filmi mund të nxisë dhunë apo sulme të ngjashme. Shqetësimet për premierën e filmit janë të mëdha, kjo edhe për shkak të vrasjes masive të 2012 në Aurora, të Kolorados, kur në natën e debutimit të The Dark Knight Rises, një tjetër film i Batmanit, u vranë në kinema 12 persona dhe dhjetëra të tjerë u lënduan.
Në një buletin të përbashkët, FBI dhe departamenti i sigurisë së brendshme, paralajmëruan agjencitë e ruajtjes së rendit që të mbajnë sytë hapur. Si kundërpërgjigje, qytetet më të mëdha kanë shtuar masat e sigurisë, përfshirë këtu Los Angelosin.
