Ditët e fundit janë shtuar dyshimet se disa elementë ultranacionalistë grekë po përgatiten për të krijuar disa turbullira në Jugun e vendit, të nxitur nga slogane luftënxitëse dhe me synime të qarta provokimin e njësisë territoriale të Republikës së Shqipërisë.
Në lidhje me këtë dyshim, ka reaguar ish-deputeti Eduart Ndocaj, i njohur si një politikan me ndjeshmëri të lartë patriotike, i cili përmes rrjeteve sociale ka kërkuar impenjimin e strukturave të sigurisë kombëtare, për të evituar ndonjë ngjarje të “pakëndshme” që mind të vijë si rezultat i neglizhencës dhe mosvlerësimit sa duhet të situatave të tilla.
Ndocaj, në reagimin e tij, ka lëshuar akuza të forta ndaj qeverisë shqiptare dhe në mënyrë të veçantë ndaj ministrit të jashtëm Gent Cakaj, për papërgjegjshmërinë ndaj situatave të tilla, të cilat së fundmi janë të shpeshta dhe me një sfond të pastër nacionalist.
Ja reagimi i plotë i ish-deputetit Eduart Ndocaj:
Ta dashur miqtë e mi|
Këto ditë, po dëgjojmë se një njësit special grek, me individë që proklamojnë slogane ultranacionaliste, do vijnë në Shqipëri për të anunçuar projektin luftënxitës të Vorio-Epirit. Nuk më befason aspak kjo gjë, pasi fqinji ynë Jugor, këtë aspiratë provokative e lançon në mënyrën më të pashembullt, duke mos marrë aspak në konsideratë parimin e marrëdhënieve të fqinjësisë, por befasuese për mua dhe për çdo shqiptar, është qëndrimi prej një “qeni të rrahur” i qeverisë shqiptare dhe diplomacisë sonë, e cila asnjëherë nuk lëshon ultimatume të qarta për parandalimin e kësaj gjuhe nga ana e shtetit grek. Ministri i Jashtëm shqiptar, një fëmijë i përkëdhelur, por i padinjitetshëm për portofolin që ai mban, duhet të reagojë fuqishëm në emër të interesave kombëtare, në emër të sovranitetit dhe paprekshmërisë territoriale. Por kush ta bëjë një gjë të tillë? Cakaj që me turbullirat e tij artikuluese, arrin të turbullojë dhe mendjendriturin kryeqeveritar, nuk është në gjendje të dallojë sensibilitetet që shkaktojnë provokime të tilla. Nisur nga një premisë e tillë, pasi nuk është hera e para që në Jugun e vendit shfaqen elementë të tillë, që provokojnë dhe shfaqen haptazi si ultranacionalistë grekë, i kërkoj Këshillit Kombëtar të Sigurisë Kombëtare të informojë qytetarët e Shqipërisë për saktësinë e informacioneve të tilla, si dhe të garantojë sigurinë e shtetasve dhe të paprekshmërisë së territorit shqiptar. Thirrja ime vjen para se të jetë vonë, por mbani mend se për neglizhenca apo mosveprime të institucioneve në mbrojtje të sovranitetit të Shqipërisë, do të konsideroheni tradhëtarë dhe do të merrni çmimin që kanë marrë tradhëtarët e ndryshëm gjatë historisë sonë.