Në një ndër fjalimet më të gjata në Kuvend, kryeministri Edi Rama ka shprehur vendosmërinë e PS dhe qeverisë që drejton për të hyrë në zgjedhjet e 30 qershorit pa opozitën. Rama, u përpoq të bindte socialistët në sallë, por edhe qytetarët se një proces elektoral pa opozitën nuk mund të cilësohet si anormal. Sipas kryeministrit, këto zgkedhje janë një proces që duhet parë si zhvillim pa probleme në jetën e vendit. “I mirëkuptoj ata që ndryshe nga unë, mendojnë se zgjedhjet pa këto parti janë anormale, por dua të ju them se kjo nuk është zgjedhja jonë dhe as faji ynë sepse ne këndvështrimin tim, kemi bërë gjithçka që kemi pasur në dorë që kjo të mos ndodhë”,- deklaroi kryeministri.
Por nga foltorja e Kuvendit, Edi Rama dhe kreu i grupit parlamentar të PS, Taulant Balla sot bën deklarata kërcënuese ku paralajmërojnë burg për drejtuesit e opozitës dhe mbështetësit e saj. Sipas drejtuesve të PS kushdo që pengon procesin e zgjedhjeve do të përballet me padi penale. Taulat Balla ishte më i detajuar në këtë pikë, duke parashikuar edhe dënimin me 8 vite burg për ata që prishin zgjedhjet.
Pas deklaratave për zgjedhje “normale” pa opozitën dhe kërcënimet me burg ndaj protestuesve dhe drejtuesve të opozitës reale, ka ardhur dhe reagimi i Partisë Demokratike. Sekretari i Përgjithshëm i PD, Gazmend Bardhi, në një konferencë për mediat deklaroi se shqiptarët do t’i tregojnë Edi Ramës se më 30 qershor zgjedhje pa opozitën nuk do të ketë. “Alternativa e vetme e Edi Ramës është sulmi kundër opozitës dhe qytetarëve dhe mbrojtja e pushtetit të krimit dhe oligarkëve! Të bashkuar, ne do t’i tregojmë kryeministrit ilegjitim se zgjedhje më 30 Qershor nuk ka për të patur”,- tha Bardhi.
Lidhur me deklaratat e Edi Ramës dhe zyrtarëve të tjerë të PS, për burgosjen e drejtuesve të opozitës dhe qytetarëve që protestojnë, Bardhi deklaroi se kryeministri nuk mund të kërcënojë më askënd. “Shqiptarët e kanë kuptuar këtë skemë grabitëse dhe rrënuese për familjet dhe fëmijët e tyre dhe janë të vendosur t’i japin fund kësaj gjendjeje. Sot, me ndalimin e makinave në të gjithë Shqipërinë, nesër me ndalimin e zgjedhjeve fallco. Kërcënimet e një kufome politike si Edi Rama nuk trëmbin askënd! Rruga jonë është pa kthim! E vetmja rrugë e drejtë për Shqipërinë si Europa janë zgjedhjet e lira e të ndershme!”,- deklaroi Sekretari i Përgjithshëm i PD.
