Situata konfliktuale me konçensionarin BERALB dhe problematikat e shumta të viteve të fundit në minierën e Munellës dhe në fabrikën e pasurimit të bakrit në Fushë-Arrëz, janë trajtuar gjerësisht sot në një takim të thirrur nga sindikata e minatorëve të këtij qyteti.
Presidenti i BSPSH, Gezim Kalaja, i pranishm në këtë takim së bashku me përfaqësues të sindikatës së minatorëve të Shqipërisë, u ndal në një rezume të shkurtër të ecejakeve të shumta nëpër të cilat ka kaluar dilogu institucional, si dhe shprehu vendosmërinë e tij për të imponuar zgjidhje konkrete në favor të minatorëve, duke qenë i gatshëm për të gjitha opsionet e mundshme të parashikuara në legjislacionin shqiptar.
Në këtë takim Kalaja, apeloi qeverinë shqiptare të zbatojë përpikmërisht aktmarrëveshjen e firmosur, e cila konsiston në dhënien e plotë të pagesave për punëtorët gjatë periudhës së mbylljes së aktivitetit të minierëave nga konçensionari, si dhe të mundësohet pa hezitim fillimi i punës në këtë minierë dhe në fabrikën e pasurimit me kapacitet të plotë.
Presidenti Kalaja, ndër të tjera, i kujtoi qeverisë shqiptare se populli është i zemëruar nga keqqeverisja dhe nga politikat sociale të ndjekuara, ndaj dhe nuk është mirë të eksperimentojë me “lojë kungulleshkash”, por përkundrazi të marrë përgjegjësitë e saj dhe të japë zgjidhje në kushte dialogu, duke kthyer sytë nga Puka dhe Fushë-Arrëzi, zona të cilat janë në kufijtë e mbijetesës.
Në përfundim të fjalës së tij, presidenti i BSPSH, garantoi minatorët e Fushë-Arrëzit dhe të të gjithë Shqipërisë, se ai është i gatshëm për të qenë në ballë të betejave sindikaliste, të cilat synojnë rifitimin e të drejtave dhe të dinjitetit të tyre.
Gjatë këtij takimi, minatorët shtruan nevojën e një proteste, e cila u mendua si opsioni adekuat për të imponuar zgjidhjen e kërkesave të tyre.
Në fund të takimit, u vendos që të lihet një afat 15 ditor, si mundësi e komunikimit dhe dialogut institucional, me palë qeverinë shqiptare dhe kompaninë BERALB, duke shpresuar se do të jepet një përgjigje konform respektimit të aktmarrëveshjes, dhe nëse nuk ofrohet asnjë zgjidhje, atëherë minatorët pritet të përshkallëzojnë qëndrimin e tyre me protesta të vazhdueshme.
