Mungesa e pritave devijuese në lumin Shkumbin, reagon deputeti demokrat/ Boçi: Banorët e lagjeve Baltaver, Cogollarëve dhe Polis i vogël po humbasin të vetmin burim. Askush nuk i dëgjon dhe nuk u vjen në ndihmë

Deputeti i Partisë Demokratike në Qarkun e Elbasanit, Luçiano Boçi, një nga zërat më të fuqishëm të opozitës, ka reaguar sot mbi shqetësimin e banorëve të lagjeve Baltaver, Cogollarëve dhe Polis i vogël, në njësinë administrative Shushicë të Elbasanit, me vite rresht kërkojnë ndërhyrjen e Qeverisë dhe të Bashkisë për ndërtimin e pritave devijuese në lumin Shkumbin.
Deputeti demokrat, teksa dëgjoi me shumë kujdes shqetësimin e këtyre banorëve, të cilëve ujërat e lumit Shkumbin po u përpijnë dhjetra hektarë tokë buke e pyje, duke i kthyer ato në zallishte, nënvizoi faktin se këta banorë askush nuk i dëgjon dhe nuk u vjen në ndihmë, ndaj dhe apeloi për vëmendje qeveritare, pasi banorët e këtushëm po humbasin të vetmin burim jetese, shtoi më tej në reagimin e tij deputeti demokrat.

Ja reagimi i plotë i deputetit Luçiano Boçi:

TRAGJEDIA E TOKËS DHE E SHKOLLËS
Banorët e lagjeve Baltaver, e Cogollarëve dhe Polis i vogël, në njësinë administrative Shushicë të Elbasanit, me vite rresht kërkojnë ndërhyrjen e Qeverisë dhe të Bashkisë për ndërtimin e pritave devijuese në lumin Shkumbin.
Ujërat e tij kanë përpirë dhjetra hektarë tokë buke e pyje, duke i kthyer ato në zallishte.
Banorët po u humbasin të vetmin burim jetese, por askush nuk i dëgjon dhe vjen në ndihmë.
Ndërkohë në zyrat e shtetit, i tregojnë me qesëndi një letër-karton, sipas të cilit Shushica na qenka zgjedhur si nje nga 100 fshatrat turistikë.
Një përqeshje gjigande kjo.
Premtimet kanë qenë të bujshme, por asnjë nuk është mbajtur.
Të lënë në harresë e në mëshirë të Shkumbinit, sot ata bëjnë apelin e fundit në prag të shirave dhe përmbytjeve që me siguri do të arrijnë deri tek pragu i shtëpisë.
Nuk mjafton vetëm kjo.
Atyre i shtohet dhe gjendja dramatike e rrugës së rrëmbyer nga lumi.
Fëmijët e lagjeve, duhet të bëjnë një orë e gjysëm në këmbë që të arrijnë shkollën, në shi, në diell, me rrugë e pa rrugë.
Transporti falas i Linditës e Ramës nuk funksionon si në shumë zona.
Jeta e tyre është një bashkësi vuajtjesh, mundimesh, dramash nga e cila, sipas dhe bindjes së vetë banorëve, dilet vetëm me protesta!