Të gjithë qytetarët, bizneset dhe institucionet buxhetore ose jo, do të mund të shlyejnë me këste faturat e papaguara të energjisë elektrike deri në fund të vitit 2024.
Të gjithë klientët, përpara se të nënshkruajnë akt-marrëveshjen për shlyerjen e detyrimeve me këste, duhet të kenë likuiduar të gjitha faturat e vitit 2023 e në vijim. Po ashtu do të reduktohen edhe kamatëvonesat për faturat e papaguara.
“Ka shumë skena të cilat janë në reduktim të kamatëvonesave. Duke qenë që afati është deri në fund të dhjetorit, i bëj thirrje qytetarëve që të bëhen pjesë e njërës prej skemave lehtësuese”, u shpreh për rtsh-në drejtoresha e Drejtorisë se Ndjekjes së debitorëve në OSHEE.
Ndërkohë që sipas saj, nëse nuk lidhet një aktmarrëveshje e tillë deri në 31 dhjetor 2024, atëherë faturat e papaguara do të likuidohen pa zbritje.
“Gjatë vitit 2025, të gjithë klientët që mbartin debi të vjetra, do të detyrohen të bëjnë pagesë totale të detyrimit. Sot e përfiton me reduktim të kamatëvonesës, ndërsa në 2025 nuk e dimë nëse do të ofrohen më skema të ngjashme”, theksoi ajo.
Të gjithë abonentët familjarë që trajtohen me ndihmë ekonomike, pensionistët-kryefamiljarë, ose ata me status të veçantë, mund t’i paguajnë detyrimet e prapambetura bashkë me faturën e muajit, me këste fikse mujore 1,200 lekë, kurse familjet e tjera do kenë këst mujor fiks 2.800 lekë nëse lidhin aktmarrëveshje.
