Në ditët e ardhshme pritet të regjistrohen temperaturat më të larta të muajit, afër 40 gradë Celsius, sipas parashikimeve meteorologjike për këtë të martë, të mërkurën dhe enjten. Meteorologët njoftojnë se edhe ditët në vijim të korrikut do të jenë me temperatura të larta.
Instituti i Shëndetit Publik bën thirrje qytetarëve të marrin masa të kujdeseshme për shkak të rrezikut nga nxehtësia e lartë.
“Rekomandohet të mos dilni nga ora 11 deri në orën 18:00,” tha Eugena Tomini, drejtoresha e ISHP-së.
Grupet më të rrezikuara përfshijnë foshnjat, fëmijët e vegjël, personat me sëmundje kronike, të moshuarit dhe gratë shtatzëna. Gjithashtu, ata që planifikojnë të pushojnë në bregdet ose të shkojnë në pishinat publike duhet të jenë të kujdesshëm kur futen në ujë për të shmangur probleme të mundshme shëndetësore.
Drejtorja e ISHP-së i kujtoi ato persona që punojnë në terren si policët dhe punëtorët në ndërtim të konsumojnë mjaft ujë për të parandaluar dehidratimin./Top Channel