Fansat e Marilyn Monroe janë të shqetësuar. Vila në të cilën aktorja kaloi vitet e fundit të jetës së saj dhe u gjet e vdekur më 5 gusht 1962 në Los Angeles, së shpejti do të shembet.
Këtë javë bashkia i dha pronarit lejen për të prishur rezidencën, një shtëpi të stilit spanjoll, 270 metra katrorë në një kat, me një kopsht dhe pishinë në pjesën e pasme.
E ndërtuar në vitin 1929, ajo qëndron në fund të një rruge të qetë pa rrugëdalje në Brentwood, një lagje luksoze ku vlera e tokës së ndërtimit aktualisht po rritet në mënyrë të ndjeshme.
Pikërisht për këtë arsye, pronari kërkon që ta prishë shtëpinë, e cila është mjaft modeste për parametrat aktualë dhe për zonën në të cilën ndodhet, dhe ta bëjë më fitimprurëse.
“Është një sulm ndaj historisë dhe kulturës së këtij qyteti”, tha Adrian Scott Fine, i LA Conservancy, një shoqatë që lufton për të ruajtur perlat arkitekturore dhe vendet historike të Los Angeles, që shpesh datojnë në dekadat e para të viteve 1900 ose epoka e artë e Hollywood dhe e shitur në një treg të pasurive të paluajtshme që nuk njeh krizë.
Ne po mbledhim firma dhe po i shtyjmë qytetarët të telefonojnë këshilltarin e urbanistikës.
E vetmja shpresë është që ai të heqë lejen e shembjes dhe ta shpallë shtëpinë një vend me interes historiko-kulturor.
Aktorja e ndërronte shumë shpesh vendbanimin në qytet. Por e vetmja shtëpi që ajo bleu për vete ishte shtëpia e bardhë në 12305 Fifth Helena Drive në Brentwood.
Ajo e bleu atë në vitin 1961, në fund të martesës së saj me dramaturgun Arthur Miller, për 75.000 dollarë. Shtëpia, e cila ka mbetur pak a shumë e pandryshuar, u shit për herë të fundit një muaj më parë, për 8.4 milionë dollarë.
Përpara derës së hyrjes janë ende pllakat mbi të cilat Marilyn kishte shkruar latinisht “Cursum Perficio” (Udhëtimi im përfundon këtu).
Një ogur i trishtuar, disa hapa më tutje, në dhomën e gjumit, diva e divave u gjet e vdekur nga një mbidozë ilaçesh në moshën 36-vjeçare.
