Kur Rexhep Taip Erdogan dhe Edi Rama shpallën vllazërinë shqiptaro-turke, Sali Berisha sovranist tashmë, deklaroi se nuk mund të jemi vëllezër me turqit. Edhe pse vetë në vitin 2012, pati deklaruar se me turqit kemi gjakun e përbashkët.
Që nuk mundemi të jemi vëllezër është qëndrim korrekt, pasi në politikë nuk ka vëllezër dhe motra, ka partnerë dhe aleatë.
Mirëpo Nikos Dendias, ministër i jashtëm i Greqisë, vizitoi pardje Tiranën dhe “problemit çam” të ngritur nga ministrja Olta Xhaçka, ai iu përgjigj se çështja e të drejtave të popullsisë çame, është çështje inekzistente dhe, shtoi ai, nëse Shqipëria do të ndjekë çështjen inekzistente çame, Greqia do ta bllokojë me veto rrugëtimin e Shqipërisë drejt Bashkimit Europian.
Asnjë reagim nga “Opozita e Vërtetë” e Sali Berishës, vetëm heshtje.
Pse opozita e vërtetë e cila zhduku opozitën fallso dhe i dha Shqipërisë opozitë reale (siç pretendojnë), hesht përballë një deklarate të tillë të ministrit grek?
Pse ministri Dendias nuk u shpall “pasardhës i klikave më të errëta shoveniste që kanë kryer genocid kundër shqiptarëve e që prandaj mohon genocidin dhe kërcënon me veto. Nikos Zerva, pinjoll i xhelatit të egër Napolon Zerva i cili masakroi shqiptarët”. Meqenëse vetë Berisha e ka qejf ketë lloj gjuhe e këto lloj epitetesh? Pse nuk i përdori por e kaloi me heshtje deklaratën e Dendias?
Pse opozita e vërtetë, përmes medias së saj, zbardh në shqip akuzat për presidentin Joe Biden, zbardh akuzat e gazetarëve kundërshtarë për sekretarin Blinken, shkruan çdo ditë kundër ambasadores Juri Kim, mirëpo për deklaratën kërcënuese të ministrit grek, hesht?
A mundet të na e zbardhë ndokush ketë mister?
