Nga Edi Rama pritet që ta shfrytëzojë muajin gusht për të reflektuar dhe për të qartësuar idetë, se kë do të ulë në postet ministrore të qeverisë së re në shtator. Për herë të tretë që përzgjedh emra ministrash, dihen tashmë “dobësitë” e Ramës .
E para, të ketë sa më shumë femra në kabinet dhe e dyta sa më shumë fytyra të reja: të dy këto elementë deçizivë në fasadën e çdo skuadre që ka krijuar dhe prezantuar ndër vite Rama.
Pak a shumë këtyre dy elementëve i mëshoi edhe Erion Velija gjatë një interviste disa ditë më parë, kur foli në emër të kryeministrit për konturet e qeverisë së re. I bindur se socialistët do të ishin sy e veshë, Veliaj la të kuptohet se vëmëndja e Ramës për javët e mbetura të verës, do të jenë nga projekti i koordinuar nga Bora Muzhaqi “Gati për Shqipërinë”, nga ku mund të dilnin edhe drejtues të rinj.
Por gjendja e pritjes nxit nervozizmin. Temperaturat e larta të korrikut morën flakë nga disa përplasje të forta që u konsumuan brenda të ashtuquajturës “familja e madhe socialiste”.
Kultura e betonit që ndan dy Erjonët
Ishte zv.kryeministri Erjon Braçe, që megjithëse ka firmosur gjithçka i kanë vënë para në mbledhjet e qeverisë kur Rama mungon, pati një thirrje të fortë kundër asaj që e quajti “kultura e betonit” në Tiranë.
Për dy ditë me radhë në fundjavë, Erjon Braçe denoncoi publikisht punimet e një kompanie ndërtimi pranë shtëpisë së tij. Pa shfrytëzuar njohjet si zv.kryeministër, Braçe “vuajti” si shumica e qytetarëve të Tiranës në pritje të reagimit të autoriteteve, që nuk i ndalën punimet e betoniereve nga orët e para të mëngjesit deri pas mesnate.
Zv.kryeministri sqaroi më pas se pse e provokoi furtunën e komenteve në rrjetet sociale, nga ata që i thonin “shteti je ti”. Shpjegimi i Braçes ngjau si një ftesë për protestë kundër “kulturës së betonit” në Tiranë, në majë të së cilës, dihet se qëndron Erion Veliaj.
“Dhuna e betonit po behet kulture. Ti mund ta marresh nje leje te ligjshme, krejt te tille por edhe atje ku cenon rregullat e perbashketa, por perseri ajo nuk eshte leje per te dhunuar dinjitetin e gjithkujt ne mes te te cileve ke hyre “me leje”! Po e perseris, si karrige, pertej kornizes se saj, e zgjidh hallin tim shpejt. Por KULTURA E FUQISE SE BETONIT, zhbehet me ze te lart e publikisht!” shkruajti zv.kryeministri i Ramës. Përgjigjen nga Veliaj nuk e ka marrë ende.
Petro Koçi çon SPAK në zyrën e Armando Subashit
Kryetari i Bashkisë së Fierit, Armando Subashi u katapultua në politikë nga zyrat e sitemit të drejtësisë. Si një ish-gjykatës, nga ai nuk pritet të ketë bërë gafat trashanike të Fatos Tushes. Por kush do ta donte SPAK-un në zyrë këto kohë?
Prokuroria e Posaçme u vu në lëvizje nga një status bombë i Petro Koçit, deputet i zgjedhur në Fier dhe kryetar i emëruar i PS në këtë qark. Pas problemeve që pati me strukturat dhe pas një rezultati të dobët në 25 Prill, Koçi shpërtheu si në kohët e vjetra. Ai tha se “duart e krimit janë shtrirë mbi financat publike” në Fier dhe se “protagonistë të trafikut të drogës dhe të dhunës tashmë kanë legalizuar subjekte biznesi që fitojnë tendera publike”.
Koçi pranon se krimi ia del të përfitojë paratë e taksave në Fier, ose përmes “lidhjeve të titullarëve të institucioneve me krimin”, ose përmes “kërcënimit të zyrtarëve”.
Vetë kryebashkiaku Armando Subashi nuk është përgjigjur asnjëherë ndaj ktyre akuzave të forta, duke i lënë shigjetimet e Petro Koçit të shkojnë drejt Albpetrol, drejt Kadastrës, apo drejt zyrave të Arsimit. Por SPAK tha se do të verifikonte çdo akuzë deputetit, që nuk dihet se çfarë mund të ketë folur në zyrat e prokurorëve.
Në anën tjetër, në radhët e pushtetit vendor nuk po fryjnë erëra të mira. Rama nuk e ndali nismën e Petro Koçit për të akuzuar krerët e institucioneve të Fierit edhe në disa televizione, pasi kishte bërë statusin në Facebook.
Gjiknuri-Balluku, luftë pa kompromis
Për të bërë të qartë se çfarë marrëdhënieje ekziston mes Belinda Ballukut dhe paraardhësit të saj në detyrë, mjafton të përmendet rasti kur ata të dy ishin bashkë me kryeministrin Edi Rama në inaugurimin e Bypass të Vlorës, siç tregon foto më poshtë, e shkëputur nga video e aktivitetit.
Tani shikoni fotot më poshtë, që janë marrë të treja nga profili në Facebook i Belinda Ballukut. Pasqyrojnë aktivitetin e inaugurimit të ByPass të Vlorës.
Por Damian Gjiknuri nuk shfaqet askund. Balluku ose e ka prerë imazhine e tij, ose i ka përzgjedhur fotot në mënyrë të tillë që të eleminojë paraardhësin e saj në detyrë.
Si të gjithë ministrat e rinj, pasi u ul në postin e Ministrit të Infrastrukturës, Belinda Balluku “fshiu” nga ministria stafin e afërt të Gjiknurit. Por megjithëse kanë kaluar disa vite që nga zëvëndësimi i njërit me tjetrin, inatet nuk janë shuar.
Përgjigjia për Ballukun ka ardhur nga stacioni “6 plus 1” në Vlorë. Televizioni ka denoncuar anullimin e Parkut Voltaik të Akërnisë nga Balluku dhe kalimin e tij në Karavasta të Lushnjes. Sipas gazetarit, kompania që e pësoi nga vendimet e Ballukut e ka ankimuar në arbitrazh vendimin e saj dhe afera që ata e quajnë “korruptive” mund t’i kushtojë buxhetit 100 milion euro.
Në kronikën e televizionit lokal të Vlorës, Gjiknuri cilësohet si një njeri me cilësi të rralla, “një politikan i suksesshëm dhe i vlerësuar nga opnioni shqiptar dhe ndërkombëtarët për punën në ministri, me kontribute në qeveri, që njihet si politikan i klasit të parë dhe liberal”.
Kurse për vendimet e Belinda Ballukut janë rezervuar epitete si “intrigante”, “djallëzore” dhe që lënë “dyshime për korrupsion”. Duket se Damian Gjiknuri nuk e ka përtypur lehtë retushimin që iu bë në profilin e Facebook të Belinda Ballukut, gjatë inspektimit të Bypass të Vlorës. Fotot përmenden edhe në kronikën e televizionit të Vlorës.
Sherret mes socialistëve vijnë në një moment, kur liderit të gjithëpushtetshëm në PS, Edi Ramës i duhet qetësi, për të pasur frymëzimin e nevojshëm për një prezantim sa më spektakolar të skuadrës së Rilindjes për mandatin e tretë. Këtë ata nuk duket se e kuptojnë. Në raste si këto, Rama e ka thënë të tijën “kokat hëngshin”.
