REDAKSIONALE
Ndryshe nga sa është mësuar opinioni publik, gara brenda PD trego se demokracia në atë parti është jetike dhe një shtyllë e rëndësishme mbi të cilën forca politike më e madhe opozitare në vend ngrihet. Evidentimi i katër kandidatëve mes të cilës edhe një zonje me kontribut në PD është gjithashtu një tjetër tabù e thyer në politikën shqiptare.
Mirëpo, ndonëse kryesia e PD miratoi një sërë vendimesh në favor të demokracisë dhe shoqërisë shumë pak media u fokusuan në këtë akt. Përkundrazi ato vëmendjen e përqëndruan në një sajesë politike se si PD përjashtoi nga gara disa kandidatë të cilët nuk i përmbushnin kushtet që vetë organizata kishte ngritur.
Kushtet e vendosura nga PD janë në vetvete ndalesa të kuptueshme që gara mos të shndërrohet në farsë politike apo në reklamë negative për vetë partinë.
Ndryshe nga partia në pushtet që ka përjashtuar garimin e brendshëm që në statut, PD ka siguruar një garë të ndershme të hapur për kandidatët e saj madje dhe më të riun që ka marrë teserën e partisë si z. Shehaj.
Prandaj kushdo që fokusohet në përjashtimet si pasojë e mungesës së përmbushjes së kritereve për të ndërtuar një stuhi në gotë duket se minimalisht nuk ka interes demokracinë. PD sot po i ofron një shans të madh qytetarëve dhe natyrisht atyre të interesuarve në politikë që të bëjnë një dallim thelbësor mes një force që demokracinë e ka fasadë dhe një force politike që demokracinë e ka në parimet e saj.
