Nga Aleks KAPLLAJ
U përdorën të dhënat personale në E-Albania, të 910 000 shqiptarëve për qëllime politike elektorale të partisë në pushtet, si dikur Gestapo dhe KGB dhe vetëm për këtë, partia socialiste duhet të dënoncohet në të gjitha institucionet europiane dhe të përjashtohet nga Partitë Socialiste Europiane, sepse kjo shkelje është e patolerueshme nga partitë Socialdemokrate.
U përdoren 69.1 mln euro nga 25 marsi deri më 25 prill nga fondi i rindërtimit në kundërshtim me ligjin elektoral dhe këto shkelje dënohen nga 4 deri në 12 vjet. U përdoren të gjitha mjetet dhe forcat e policisë për të bërë fushatë elektorale për PS duke penguar opozitën me pretekstin se ishim të mbyllur nga Pandemia. Të gjitha mediat janë në shërbim të Ramës dhe hapësira për opozitën është vetëm për t’a goditur atë, një problem jetik për demokracinë në Shqipëri.
Mjafton të kujtojmë Engjëll Agaçin, sekretarin e përgjithshëm të kryeministrit Rama, që i kërkoi Becchettit shprehimisht: “Duhet të flasësh me Enkelejd Jotin, drejtorin e përgjithshëm të Top Channel. Francesco Becchetti: Përse duhet të flas me z. Joti, i cili nuk është një zyrtar publik, por drejtori i përgjithshëm i një televizioni privat? Engjëll Agaçi: Nuk është ide e mirë t’i bësh opozitë shtetit” dhe për këtë kërcënim gjykata e arbitrazhit ndëshkoi Shqipërinë me 110 mln euro për mbylljen e këtij televizioni.
Pra Agon Channel TV, u mbyll qëllimisht për t’i mbyllur gojën kritikës ndaj qeverisë dhe për të eliminuar konkurencën mediave vizive që janë në shërbim të kryeministrit shqiptar. Me 4 maj, 9 ditë mbas zgjedhjeve Top Channel Story trasmeton një “histori” për Bizneset e PD, duke hedhur balte mbi Partinë Demokratike. U përdor në mënyrë të paligjshme administrata për fushatë elektorale. U imponua një Kod Zgjedhor nga rilindja për të favorizuar Partinë Socialiste dhe për të zhvlerësuar votat për opozitën.
U mbyllen të gjitha dosjet 184 e 339 të vjedhjeve dhe manipolimit të votës në zgjedhjet e kaluara si mesazh për të gjithë që këtë herë duhet të bëjnë të njëjtën gjë, por më shumë dhe më të studjuar, sepse jeni të mbrojtur nga drejtësia moniste në shërbim të Ramës. U zhvilluan zgjedhjet lokale moniste dhe vazhdojnë të administrojnë në mënyrë të paligjshme edhe sot. U mbush vendi me drogë përherë e më shumë dhe bandat janë joint-venture me shtetin. Mbi 400 mijë shqiptarë kanë braktisur vendin dhe me zgjedhjet e fundit ky trend do të thellohet, duke varfëruar vendin edhe më shumë. Reforma në drejtësi është pothuajse e dështuar dhe i shërben vetëm forcimit të pushtetit të Ramës.
Pamela Qirko Balluku, motra e ministres Balluku, është kryetare e Komisionit të Pavarur të Kualifikimit, pra Vetingut në drejtësi. Arben Kraja kryetar i SPAK, hetuesi i regjimit komunist, që ka denuar të rinjtë me nenin e arratisjes me mentalitetin e luftës së klasave, sot në shërbim të nomenklaturës së re, pasardhëse e Organizatës kriminale PKSH, PPSH. Aida Hajna drejtore e Byrosë Kombëtare të Hetimit, vajza e drejtueses së Komitetit të Partisë se Punës në Pogradec dhe Tepelenë, Hatika Hajna. Drejtësia është në krahun e krimit dhe kundër qytetarëve dhe avokatëve.
Kjo vërtetohet edhe me praninë e “lavatriçeve” të parave të krimit me bisneset në qytetet bregdetare, ku shumica e tyre janë e mafies së kontrabandës dhe gjykatësve dhe prokurorëve të inkriminuar. Siguria e jetës është në nivelin e vendeve latino amerikane, sepse drejtësia ka vetëm raporte bisnesi me krimin. Pasuritë Kombëtare janë dhënë nga Rama që nga viti 2013, vetëm grupit të interesit që bashkëpunojnë me të dhe i kthejnë favoret duke punuar për të në fushatat elektorale.
