Komisioni i Ankesave dhe Sanksioneve në Komisionin Qendror të Zgjedhjeve, (KAS), pritet që të mblidhet sot në orën 10:00 për të dhënë vendimin pas shqyrtimit të ankesave për qarkun e Beratit.
Vetë KAS në një njoftim me një video të shkurtër bëri me dije një ditë më parë se dhënien e vendimit e shtyu për sot, pasi po merr në konsideratë mundësinë e pranimit të disa provave shtesë dhe se do t’ju duhej kohë për t’i verifikuar.
Gjatë mbledhjes së zhvilluar një ditë më parë pati debate mes përfaqësuesve të subjekteve të opozitës, Partia Demokratike, Lëvizja Socialiste me anëtarët e KAS për zgjedhjet parlamentare të 25 prillit në qarkun e Beratit.
Mbledhja nisi me paraqitjen e dokumenteve shtesë që opozita i quan prova në lidhje shkeljet dhe pretendimet për këtë qark.
Të parët që folën në këtë mbledhje ishin përfaqësuesit e opozitës. Altin Kaziaj, përfaqësuesi i LSI që kërkon rinumërim të votave tha se në Berat në një prej qendrave të votimit ka një mospërputhje të numrit të votuesve me fletët e votimit dhe ata që janë regjistruar në pajisjen e identifikimit (PEI).
Ndërkohë që ky fakt u kundërshtua nga juristi i Partisë Socialiste, Eridian Salianji, i cili tha se janë bërë hetime dhe se të gjithë komisionerët janë dakordësuar për problematikat e mundshme.
Ndërkohë që Partia Demokratike dhe përfaqësuesi i saj, Marash Logu u përplas me anëtarin Ilir Rusmalji, i cili kërkoi argumentim të kërkesave të opozitës, ndërsa Logu i kërkoi që të merreshin provat nga Prokuroria. PD deklaroi se “kandidatët e PS, veçanërisht, Hatixhe Konomi dhe Nasip Naço kanë ngritur një skemë kriminale të blerjes së votës me 50 mijë lekë për person”.
Ndërsa përfaqësuesi i Partisë Socialiste Eridian Salianji nuk I konsideroi prova të vlefshme. PD kërkon ripërsëritje të zgjedhjeve.
Por në cilën fazë është procesi?
Pas humbjes në zgjedhjet e 25 prillit 2021, opozita ka ankimuar rezultatin e zgjedhjeve.
PD-AN ka ankimuar rezultatin në 9 qarqe ndërsa LSI në 5. PD kërkon rivotim, ndërsa LSI kërkon edhe rinumërim edhe rivlerësim të votave.
Por në rastin e qarkut të Gjirokastrës, KAS i rrëzoi kërkesat e opozitës që i cilësoi si të pavlefshme dhe të bazuara në shpifje dhe jo në prova.
