Ish-kandidati për deputet i Pukës në zgjedhjet e 25 prillit, Lodovik Hasani, ka adresuar një mesazh urimi për të gjithë besimtarët myslimanë, duke u dëshiruar atyre fat e begati në familje!
Në mesazhin e përcjellë për besimtarët e komunitetit pukjan, Hasani ka apeluar për më shumë mirëkuptim, pranim të njëri- tjetrit, harmoni ndërfetare dhe dashuria njerëzore!
“Le të jetë Fiter Bajrami, shembulli i duhur për të shfaqur vlerat dhe virtytet më të mira të komunitetit dhe të traditës së pukjanëve, bazuar në respektin e përkushtimin ndaj familjes, pranimin e të tjerëve, dhembshurinë e përkujdesjen ndaj njerëzve në nevojë, të pamundurve, të sëmurëve, jetimëve, të braktisurve dhe të moshuarve, duke iu gjendur pranë plot mirësi e bujari!“, vijon urimin e tij, ish-kandidati Lodovik Hasani në mesazhin e drejtuar me rastin e festës së shenjtë për besimtarët myslimanë.
Urimi i plotë:
Të dashur vëllezër dhe motra, besimtarë myslimanë të Pukës!
Në këtë prag feste të madhe e gëzimi për ju dhe familjet tuaja, pas një muaji të shenjtë agjërimi, plot sakrifica e mundim, përkushtim e respekt ndaj besimit në Zot, ju shpreh urimet më të ngrohta dhe më të përzemërta: Gëzuar Festën e Fiter Bajramit!
Kjo ditë e shenjtë e kalendarit Islam, uroj të na gjejë më të paqtuar, më tolerantë e më solidarë mes nesh!
Mirëkuptimi, pranimi i tjetrit, harmonia e mrekullueshme ndërfetare dhe dashuria njerëzore, për të cilat kemi nevojë më shumë se kurrë në këto kohë krizash të mëdha të vlerave përfaqësuese, uroj të udhëheqin komunitetin tonë për më shumë zhvillim e begati!
Le të jetë Fiter Bajrami, shembulli i duhur për të shfaqur vlerat dhe virtytet më të mira të komunitetit dhe të traditës së pukjanëve, bazuar në respektin e përkushtimin ndaj familjes, pranimin e të tjerëve, dhembshurinë e përkujdesjen ndaj njerëzve në nevojë, të pamundurve, të sëmurëve, jetimëve, të braktisurve dhe të moshuarve, duke iu gjendur pranë plot mirësi e bujari!
Të dashur besimtarë myslimanë pukjanë kudo ndodheni:
Zoti ju dhëntë shëndet, fat e begati në familje!
Zoti ju bekoftë ju dhe familjet tuaja!
Me përzemërsi, Lodovik Hasani
