Nga Elona CASLLI-
Ka disa mekanizma që Edi Rama dhe Erion Veliaj kanë vendosur të përdorin për të fituar mandatin e tretë
Mekanizmi i parë është demotivimi i njerëzve për të votuar. Përmes dy fjalive: “Të gjithë njësoj janë. E kush do vijë po iku Rama?! ” Rama synon të mpijë vullnetin e njerëzve për të votuar më 25 prill.
Për çfarë i shërben kjo mpirje Ramës?!
Dihet qartë që ushtarët e Rilindjes do të paraqiten që në të gdhirë më 25 prill pranë qendrave të votimit. Pra, votat e Rilindjes nuk cënohen në këtë rast.
Kushdo që nuk është në ushtrinë e Rilindjes, por demotivohet për të votuar nga propaganda e kësaj të fundit, është një votë indirekte Pro Rilindjes.
Atë çka i ka bërë Tiranës Erion Veliaj dhe Edi Rama gjatë tetë viteve nuk ia ka bërë kush.
Dhe mjafton ky argument dhe asgjë tjetër për rrëzuar propagandën e Rilindjes nën sloganin – Të gjithë njësoj janë.
Mekanizmi i dytë është krijimi i partive të reja pak muaj para zgjedhjeve. Këto Parti të reja që serviren si zgjidhje përfundimtare për shqiptarët nuk e besojnë as vetë përrallën e fitores mbi të gjitha forcat partiake në vend.
Të fillosh të mbledhësh firmat për krijimin e partisë pesë muaj para zgjedhjeve dhe ta regjistrosh partinë në gjykatë 3 muaj para zgjedhjeve dhe të ngresh strukturat në të gjithë vendin 1 muaj para zgjedhjeve dhe të shpresosh se do dalësh i pari në garë, duhet të jesh sikundër shprehet me të drejtë Fatos Lubonja ose delirant ose në funksion të Edi Ramës.
Pse i shërben Ramës ky proces?!
Dihet fort mirë se asnjë socialist nuk do të shkojë të votojë Jozefina Topallin, Rudina Hajdarin, Patozin apo Murrizin.
Votat do të tkurren nga elektorati i djathtë.
Ndërkohë që votat tkurren nga e djathta, votat e ushtrisë rilindase mbeten të pacënuara.
Mendoj se qoftë Murrizi, qoftë Hajdari dhe akoma më mirë Topalli dhe Patozi, e dinë fort mirë se nuk do të marrin aq vota sa të realizojnë përfaqësimin në Parlament, por ama mund të realizojnë projektin për të cilin janë krijuar; çuarja e votave ďëm nga e djathta.
Me pak fjalë, demotivimi i pjesës gri dhe rrjedhja e votave nga e djathta, ushqejnë më së miri mundësinë e një mandati të tretë për Edi Ramën, pasi numri i votuesve të Rilindjes mbetet i pacënuar në çdo rast.
Post Scriptum- Për të kuptuar këtë gjë, nuk nevojiten studime të thelluara në Oksford. Mjafton edhe një diplomë modeste në Universitetin e Tiranës.
