Italia është bërë vendi me numrin më të madh të vdekjeve në botë, si rezultat i koronavirusit. Ditën e sotme, kanë ndërruar jetë 427 persona, duke e çuar numrin e vdekjeve në 3,405. Kjo shifër, kalon për herë të parë numrin e të vdekurve në Kinë, vendi ku u shfaq fillimisht koronavirusi Covid-19 dhe ku kanë ndërruar jetë 3,245 persona.
Popullësia kineze është 20 herë më e madhe se ajo e Italisë dhe numri i të infektuarve me koronavirus është pothuajse dyfishi në Kinë, në raport me Italinë. Megjithatë, ekspertët mendojnë se numri i të infektuarëve në Itali është shumë më i lartë, por testimet janë të limituara, ndaj jo të gjithë të infektuarit reflektohen në statistika.
Italia ka qenë vendi më i goditur nga virusi në Europë. Qeveria ka vendosur masa radikale izolimi, në përpjekje për të frenuar përhapjen e virusit, por ende shumë qytetarë vijojnë të humbasin jetën.
Sistemi Shëndetësor në Itali, ka qenë nën një presion të jashtëzakonshëm dhe ka operuar përtej të gjithë kapaciteteve.
Përhapja masive e koronavirusit në Itali, u shfaq fillimisht në 21 Shkurt, në veri të vendit.
Pas përhapjes masive të Covid-19 në Itali, qeveritë në mbarë Europë, kanë nisur të adoptojnë masa më radikale, si mbyllja e shkollave, apo thirrjet për vetë-izolim në shkallë të gjerë, në përpjekje për të ndalur pandeminë.
Në Shqipëri, deri në këto momente, janë zyrtarisht të infektuar 64 persona dhe kanë ndërruar jetë 2 persona. Qeveria ka vendosur një karantinë në shkallë vendi dhe masa mjaft radikale të izolimit, për të ndalur një skenar të mundshëm të ngjashëm me atë italian, por edhe për të mos patur një kolaps të plotë të sistemit shëndetësor.
