Kryetari i Partisë Demokratike, Lulzim Basha në një deklaratë për mediat rreth mesditës së sotme ka bërë të ditura detajet e aksionit opozitar për ditët në vijim.
Kryedemokrati Basha ka theksuar para mediave, se opozita do të prezantojë një platformë, e cila sipas tij do të jetë një ofertë dhe një plan kombëtar masash, që Shqipëria të mos humbë më kohë në rrugën e saj drejt BE-së.
“Në ditët në vijim opozita do të prezantojë një platformë për “Shqipërinë si gjithë Europa”, e cila do të jetë si një një ofertë dhe plan kombëtar, për të mos humbur më shumë kohë dhe mundësi të çmuar duke e mbyllur sërish derën e Europës për Shqipërinë”-tha Basha.
Gjithashtu Basha tha se platforma ka për qëllim “t’i japë fund krizës politike në vend, të nxjerrë kriminelët nga institucionet, nga ekonomia dhe për ti çuar para drejtësisë”.
Basha ka përmendur edhe rastin e Valdrin Pjetrit, i cili u tërhoq nga marrja e detyrës së kryebashkiakut, pas akuzave se ishte i dënuar dhe dëbuar nga Italia për trafik droge.
Të njëjtën situatë PD paraqiti edhe për kryebashkiakun e Vorës, Agim Kajmakun, të cilin e akuzon se ka qenë i dënuar dhe i dëbuar nga Greqia. Për këto akuza, PD i kërkoi sot Prokurorisë të bëjë verifikimet përkatëse. Në këto kushte, Basha ngriti pyetjen, se sa kryebashkiakë të tjerë mund të jenë të dënuar, por që sipas tij po mbrohen nga Edi Rama.
“Këto ngjarje tregojnë degjenerimin përfundimtar të Edi Ramës. Ka kthyer në krye të PS-së Tom Doshin, një njeri në listën e zezë të SHBA. Caktuan një kriminel të dëbuar nga Italia kandidat për në bashkinë e Shkodrës, ai duhej të ndiqej penalisht, e prokuroria përpiqet të mbyllë dosjen 184 përpara se të krijohet SPAK-u. Edhe rasti i Agim Kajmakut, një tjetër individ me precedentë penalë në Greqi, që Rama dhe persona të tjerë përgjegjës në kupolën e lartë socialiste kanë pasur dijeni të plotë. Edhe ai ka mohuar precedentin penal në shtetin fqinj, fakti është se ai është një person me precedent penal të hapur me drejtësinë greke.
Ky fakt dihet nga Edi Rama, i komunikuar atij nga partnerët ndërkombëtarë dhe ai ka zgjedhur ta kandidojë për Bashkinë e Vorës. Sa të tjerë nga këta kryebashkiakë janë me precedentë penalë? A nuk është kjo një provë se kriza politika dhe kushtetuese ka një burim, kriminalizimin e plotë të politikës me Edi Ramën në krye. Ai nuk përfaqëson më interesat e socialistëve, por të kriminelëve”, u shpreh lideri i opozitës.
