Nuk ndalon ish-ministri Bushati në kritika ndaj qeverisjes së PS-së. Ai foli para disa ditëve në parlament duke i bërë thirrje ndërgjegjes së deputetëve të PS dhe direkt kryeministrit se vendi po shkon drejt përplasjes dhe se duhet gjetur një urë kompromisi me opozitën. Ndërsa këtë të premte ish-ministri i Jashtëm dhe aktualisht deputeti i PS-së, Ditmir Bushati në kuadër të turit “Bashkia që duam” nga Shkodra u shpreh se qyteti verior ndodhet shumë larg “Shkodrës që duam”.
Bushati tha se përgjegjësinë ekskluzive për këtë e ka PD, por edhe PS-ja, ndërsa theksoi se edhe me rilindjen urbane nuk janë të kënaqur.
“Shkodra që duam është shumë larg Shkodrës që është sot për sot. Këtu nuk diskutohet që përgjegjësinë ekskluzive e ka PD, por edhe ne kemi përgjegjësitë tona. Grupi i deputetëve, qeveria jonë, përfaqësuesit tanë në pushtet vendor në struktura të ndryshme. Nuk jemi të kënaqur me atë çka kemi bërë për Shkodrën me rilindjen urbane. Pavarësisht që Shkodra ka stadium, stadiumi nuk është kthyer në ekonomi vendore për qytetin. Pavarësisht se këtu kanë ardhur yje të botës për të luajtur futboll me kombëtaren shqiptare apo me kombëtaren e Kosovës. Kemi bërë disa investime të tjera rreth e përqark, aty ku është përgjegjësia jonë. Por në çdo lagje dhe familje ndjej të njëjtën kërkesë. Nevojën dramatike për më shumë investime”,- deklaron Ditmir Bushati.
Ish-ministri vazhdoi edhe me kritika të tjera që e zemëruan kryeministrin, i cili nuk e duronte Bushatin që fliste në atë mënyrë kritike.
Ditmir Bushati dhe Fatmir Xhafa mbeten dy figura dinjitoze në PS, të cilët kundërshtojnë kryeministrin në mënyrën se si qeveris dhe si shkon në përplasje ballore me opozitën.
