Nga, Shpëtim Axhami
Kryetar i PLL
Burrat e kombit kanë veç ditëlindje…
Si sot, më 5 prill të vitit 1939, 87 vite më parë, lindi biri dhe trashëgimtari i NMT Zogu i Parë dhe i MS Mbretëreshës Geraldinë – Leka I.
Lufta e Dytë Botërore dhe vendosja e diktaturës komuniste në Shqipëri bënë që, ashtu si familje të tjera mbretërore evropiane, edhe Familja Mbretërore Shqiptare, me trashëgimtarin e tyre Leka I, të detyrohej të jetonte në mërgim.
Kur Familja Mbretërore ndodhej në Francë, në vitin 1955 ai u regjistrua në shkollën “Shqiponjat” në Zvicër. Në vitet 1956–1959 vazhdoi studimet në Akademinë Ushtarake Mbretërore në Londër. Më pas studioi Shkenca Politike dhe Ekonomike në Universitetin e Sorbonës në Francë. Ai zotëronte pesë gjuhë të huaja: anglisht, frëngjisht, italisht, spanjisht dhe arabisht.
Më 5 prill 1957, kur Princi Leka mbushi 18 vjeç, Mbreti Zog, në prani të shumë personaliteteve të botës shqiptare në mërgim dhe miqve të huaj, e shpalli atë “Trashëgimtar të Kurorës M bretërore Shqiptare”
Më 15 prill 1961, në ceremoninë speciale të organizuar në Paris, në prani të ish deputetëve të Parlamentit të Mbretërisë Shqiptare, si dhe të 70 delegatëve të përzgjedhur nga e gjithë mërgata, Asambleja e mbledhur zyrtarisht, në bazë të artikujve 51 dhe 55 të Statutit Themeltar të Mbretërisë Shqiptare, e shpalli dhe e kurorëzoi unanimisht Princin Leka si “Mbret i Shqiptarëve”. Pas kësaj, në përputhje me nenin 56 të Statutit, Sovrani i ri bëri betimin kushtetues si Mbret i Shqiptarëve.
“Unë, Leka i Parë, Mbret i Shqiptarëve, në minutën që hip në fronin e Mbretërisë Shqiptare dhe marr në dorë pushtetin mbretëror, betohem para Zotit Fuqiplotë se do të ruaj njësinë kombëtare, pavarësinë shtetërore dhe tërësinë tokësore. Do të ruaj statutin dhe do të veproj sipas tij dhe ligjeve në fuqi, duke pasur gjithmonë parasysh të mirën e popullit. Perëndia na ndihmoftë.”
Çështja kombëtare (Kosova, Çamëria), largimi i komunizmit dhe ideali i Shqipërisë etnike ishin në qendër të veprimtarisë së Mbretit Leka I gjatë gjithë jetës së tij.
Në fund të viteve ’60 vizitoi SHBA-në, ku takoi shumë personalitete shqiptare patriotike. Në vitin 1969 zhvilloi takime në Australi, duke folur për çështjet kombëtare dhe gjendjen e Shqipërisë.
Aktiviteti i tij politik kulmoi në vitin 1972 në Spanjë, me Konferencën e Madridit, ku morën pjesë përfaqësues të diasporës shqiptare nga e gjithë bota. Aty u vendos krijimi i Frontit Nacionalist Antikomunist kundër regjimit të Tiranës dhe u miratua ideja për një Shqipëri etnike.
Mbreti Leka I do të shprehej:
“Kushtet e rrezikshme në të cilat ndodhet atdheu dhe kombi ynë kërkojnë që i gjithë emigracioni shqiptar të përmbushë misionin historik në mbrojtje të të drejtave tona; prandaj kërkohet bashkim.”
Në qershor 1975, gjatë Konferencës së Helsinkit për sigurinë dhe bashkëpunimin në Evropë, ai i dërgoi një memorandum ku theksonte se nuk do të njihte asnjë vendim që cenonte të drejtat e popullit shqiptar dhe integritetin kombëtar.
Më 8 tetor 1975, Mbreti Leka u martua me Mbretëreshën Suzana. Nga kjo martesë lindi trashëgimtari i tyre, Princi Leka II.
Më vonë, ai krijoi Këshillin për Çlirimin e Shqipërisë Etnike dhe strukturat përkatëse. Në vitin 1977, gjatë një konference në Beograd, deklaroi:
“Nuk mund të ketë paqe dhe mirëkuptim në Ballkan pa u njohur integriteti territorial i Shqipërisë me Kosovën dhe Çamërinë.”
Për shkak të rrethanave politike, u detyrua të largohej dhe të jetonte në mërgim, fillimisht në Rodezi dhe më pas në Afrikën e Jugut.
Në gusht 1981 i drejtoi një letër Sekretarit të OKB-së, ku kërkonte dënimin e dhunës ndaj shqiptarëve të Kosovës dhe të drejtën e tyre për vetëvendosje.
Zhvillimet e viteve ’90 i ndoqi me vëmendje, duke paralajmëruar manipulimin e zgjedhjeve të vitit 1991. Në vitin 1993 realizoi një vizitë të shkurtër në Tiranë.
Në referendumin e vitit 1997 zhvilloi një fushatë aktive në të gjithë vendin. Edhe pse rezultati zyrtar ishte 34%, të gjithë e dimë se ai në të vërtetë ishte saktësisht i manipuluar.
Në qershor 2002, me kërkesë të 76 deputetëve, Familja Mbretërore u kthye në Shqipëri dhe u prit nga mijëra qytetarë.
Në vitin 2005 propozoi një alternativë të re politike me intelektualë dhe atdhetarë, duke synuar një drejtim ndryshe, përsa ishte parë deri në këtë vit, për vendin.
NMT Leka I ndërroi jetë më 30 nëntor 2011 në atdheun e tij. Në këtë ditë zie kombëtare u zhvillua ceremonia zyrtare mortore në Parlamentin e Shqipërisë.
Këto janë vetëm disa nga momentet kryesore të veprimtarisë së madhe të Mbretit Leka
Lavdi, i përjetshëm kujtimi i Mbretit Leka I 
