Rrugët me kalldrëm të Pazarit të Vjetër në Gjirokastër janë mbushur me ngjyra, muzikë dhe maska shumëngjyrëshe në kuadër të karnavaleve të qytetit. Fëmijë, të rinj dhe qytetarë janë bërë pjesë e paradës festive, duke sjellë një atmosferë të veçantë në qytetin e gurtë.
Të veshur me kostume të ndryshme dhe maska kreative, pjesëmarrësit kanë parakaluar në rrugët kryesore të qytetit, ndërsa muzika dhe performancat artistike kanë shoqëruar aktivitetin gjatë gjithë ditës. Në festë kanë marrë pjesë edhe nxënës të shkollave dhe fëmijë të kopshteve, të cilët me entuziazëm kanë sjellë energji dhe gjallëri në këtë aktivitet tradicional.
Karnavalet në Gjirokastër janë kthyer vitet e fundit në një aktivitet kulturor që synon të gjallërojë jetën artistike të qytetit dhe të tërheqë vizitorë në sezonin pranveror. Qytetarë dhe turistë kanë ndjekur nga afër paradën, duke shijuar atmosferën festive në zemër të qytetit muze.
Aktivitetet pritet të vijojnë edhe me performanca të tjera artistike dhe organizime kulturore, duke e kthyer Gjirokastrën në një pikë takimi për festën dhe traditën.
Video në link👇
https://www.facebook.com/share/v/1ZfDnK7vTh/?mibextid=wwXIfr
