Deputeti i Partisë Demokratike për Qarkun Durrës, Arian Ndoja, ka reaguar përmes një postimi në profilin e tij në Facebook lidhur me zgjedhjet e zhvilluara në Degën e Partisë Demokratike në Durrës, ku në krye të saj është zgjedhur Adrian Gashi.
Në mesazhin e tij, Ndoja thekson se procesi zgjedhor i zhvilluar në këtë degë ka treguar përgjegjësinë dhe pjekurinë politike të aktorëve brenda Partisë Demokratike në Durrës, duke e cilësuar atë një hap të rëndësishëm drejt bashkimit, ringritjes dhe ndërtimit të një force politike me mentalitet fitues në këtë bashki.
Deputeti demokrat shprehu gjithashtu mirënjohje për ish-kryetarin e degës, Ardian Muka, për kontributin e dhënë ndër vite dhe për vendimin e tij për të dhënë dorëheqjen, një veprim që sipas Ndojës krijoi mundësinë për zhvillimin e zgjedhjeve dhe për një proces të ri organizativ brenda partisë.
Në reagimin e tij, Ndoja vlerësoi edhe qëndrimin e kandidatëve që morën pjesë fillimisht në garë, duke theksuar se tërheqjet e tyre në funksion të bashkimit janë një shenjë e qartë përgjegjësie dhe emancipimi politik, me qëllim forcimin e Partisë Demokratike dhe përgatitjen për sfidat që e presin këtë degë në të ardhmen.
Ai theksoi gjithashtu se në këtë proces kanë dhënë kontribut edhe deputetët e Qarkut Durrës, Oerd Bylykbashi, Igli Cara dhe Artan Luku, të cilët sipas tij janë pjesë e një platforme që synon suksesin dhe bashkimin e të gjithë strukturave të partisë.
Në përfundim të mesazhit të tij, deputeti Arian Ndoja shprehu bindjen se Adrian Gashi është personi i duhur për të drejtuar Partinë Demokratike në Durrës, duke garantuar mbështetjen e tij të plotë në këtë rrugëtim politik.
“Puna jonë tashmë ka filluar”, thekson Ndoja në mesazhin e tij, duke uruar njëkohësisht të gjithë anëtarët e Partisë Demokratike në Durrës për procesin e zhvilluar dhe për sfidat që i presin në vijim.
Postimi i plotë:
Të nderuar miq!
Dje u bënë zgjedhjet për Kryetarin e Ri të Degës së Partiaë Demokratike Durrës, ku Kryetar u zgjodh Z. Adrian Gashi.
Zgjedhjet e djeshme treguan përgjegjësinë e lartë të të gjithë aktorëve politikë brenda Partisë Demokratike Durrës, që nga fillimi i procesit, nisur nga nevoja për bashkim, ringritje dhe për konkurim si forcë me mentalitet fitues në këtë Bashki.
Gjej rastin të falenderoj Z. Ardian Muka për kontributin e dhënë me punën e tij te deritanishme, për krijimin e mundësisë së realizimit të zgjedhjeve në Parti nëpërmjet dorëheqjes së tij, shenja emancipimi qytetar dhe politik që duhet të merren si shembull nga të gjithë anëtarësia e Degës.
Njëkohësisht kam një falenderim për të gjithë kandidatët që ishin fillimisht pjesëmarrës në garë që bazuar në logjikën e bashkimit dhe jo ndasive, dhënies së kontributit real për Partinë Demokratike, me qëllim arritjen e rezultateve sa më të mira nga kjo degë në sfidat e shpejta që e presin, bashkëpunuan në favor të procesit të bashkimit të të gjithë rrymave në parti.
Tërheqjet nga gara janë shenjë e lartë përgjegjësie, emancipimi politik dhe social dhe dëshirë e qartë që kjo Degë të jetë fituese, dhe duhet të merren si model nga të gjithë ata që dëshirojnë përbashkim dhe fitore.
Kontribut në këtë proces kanë dhënë në mënyrë të qartë dhe largpamëse edhe Deputetët e Qarkut Durrës, Z. Oerd Bylykbashi, Z. Igli Cara dhe Z. Artan Luku, të cilët janë pjesë e kesaj platforme fituese.
Jam i bindur që Partia Demokratike Durrës me këtë proces ka treguar se kulti i individit nuk duhet të ekzistojë, dhe vetëm pjesëmarrja me kontribut real do jetë kriteri përcaktues i karrierës politike në këtë dege.
Z. Adrian Gashi është njeriu i duhur që do ta udhëheqë këtë ekip drejt sfidave të së ardhmes dhe jam besimplotë që do të ketë rezultate shumë të mira dhe do ketë mbështetjen time maksimale në këtë rrugëtim.
Të gjithë anëtarëve të Partisë Demokratike Durrës u uroj suksese për procesin e zhvilluar dhe punë të mbarë.
Puna jonë tashmë ka filluar…..
