Vizita e Sekretarit Amerikan të Shtetit, Antony Blinken, ishte një ngjarje e rëndësishme për Shqipërinë.
Sigurisht që Edi Rama dhe pushteti do ta përdorin këtë vizitë si mbështetje ndaj tyre, por, siç u tha edhe disa herë gjatë takimit, ajo më së pari është një mbështetje ndaj Shqipërisë dhe kombit tonë, ashtu siç ka qenë historikisht.
Gjatë konferencës për shtyp, Edi Rama nxitoi të bëjë përherë atë që di të bëjë më mirë në raport me kryeministrin e Kosovës, duke bërë patronazhistin e qëndrimeve dhe kritizierin e vendimeve të qeverisë kosovare në lidhje me qëndrimet e tyre të fundit.
Nuk është hera e parë që Rama e bën një gjë të tillë, sepse dihet, tashmë, marrëdhënia jo e mirë e tij me Albin Kurtin, të cilin nuk lë moment pa e shpotitur.
Një marrëdhënie e tillë e tensionuar ka nisur që në projektin e “Ballkanit të Hapur”, ku Kosova nuk pranoi të merrte pjesë, gjë që rezultoi e drejtë me ngjarjen e mëvonshme të Bajskës në Zvetçan.
Përveçse këtij sulmi të paprecedent ndaj Albin Kurtit dhe vendimeve të qeverisë së Kosovës, Edi Rama foli edhe për sistemin e drejtësisë dhe për mbështetjen që qeveria e tij i ka dhënë, pa përmendur sulmet e vazhdueshme që ai apo zyrtar të tjerë të PS-së bëjnë ndaj drejtuesit të SPAK-ut, Altin Dumanit, apo përpjekjen e tyre për të ngritur komision për të kontrolluar punën e institucioneve të reja të drejtësisë.
Po ashtu, Edi Rama nuk mund të flasë për një sistem drejtësie që praktikisht i ka rrëzuar të gjithë themelet e qeverisjes së tij, duke i futur gjysmën e kabinetit në burg dhe pjesën tjetër në radhë.
Është ironike e gjitha kjo që bën Rama, por sigurisht që ai e përdor për PR.
Nuk mund të ketë një qeverisje të korruptuar dhe një kryeministër të ndershëm.
Edi Rama dhe shqiptarët e kuptojnë këtë.
Madje, një gjë të tillë e kuptojnë edhe amerikanët, të cilët kërkojnë parnterë të besueshëm në Shqipëri.
