Kryebashkiaku i Shkodrës Bardh Spahia, ka reaguar pas rezultatit zhgënjyes të zgjedhjeve të së dielës, ku ai humbi përballë kandidatit socialist Benet Beci, me një diferencë prej afro 10 mijë votash.
Teksa falënderon të gjithë qytetarët për mbështetjen që i kanë dhënë në këto zgjedhje, Spahia shprehet se çdo pushtet i dalë nga bota e krimit dhe paratë e pista nuk jeton gjatë.
“Çdo pushtet i dalë nga bota e krimit dhe paratë e pista nuk jeton gjatë, ndërsa shpirti i lirë i Shkodrës i ka rezistuar edhe kohëve më të errëta.
Mirënjohje për të gjithë qëndrestarët dhe ata që nuk bëjnë kompromis për lirinë”, shkruan Spahia në postimin e tij.
Më herët ishte kandidati i PS-së Benet Beci, ai që shpalli fitoren në Shkodër, pasi rezulton mbi 11 mijë vota në avantazh përballë Bardh Spahiut.
Ndonëse ka ende disa kuti pa u numëruar, avantazhi është i thellë, ndërsa nuk pritet që ky rezultat të thyhet.
Beci në një prej KZAZ-ve shprehu mirënjohje për bashkëpunëtorët dhe numëruesit e votave, ndërsa shtoi se ishte krenar për rezultatin. “Vijoni procesin me qetësi siç e keni bërë. Jemi krenarë për rezultatin tonë”, tha Beci.
