Nga Edlira Devolli-LEKA
Në mbledhjen e këshillit kombëtar të datës 30.08.2021, çdo gjë shkoi mirë. Madje dhe kush kishte ndonjë dyshim për të qenë “pro apo kundër” ndonjë zgjedhjeje, i mjaftonte të hidhte sytë nga Berisha i cili pa mbaruar fjalën Basha apo Bardhi ngrinte dorën për “pro”.
Ai “legjenda” miratonte çdo gjë që propozohej nga lidershipi. Thua ta kishte nga naiviteti?!
Kush e njeh mirë e di që ai nuk është naiv, as njeri që “fle mbi dafina” dhe i le të tjerët në punën e vet. Madje në kohën kur bëheshin listat për deputet, kishte nga ata afër tij tani, e pranë Bashës atëherë që sugjeronin, nëse doni të hyni në lista ”kaloni nga doktori”.
Dhe pati nga ata që dëgjuan këshillat dhe u shpërblyen me vendin e deputetit. Mos vallë e kishte nga mungesa e informacionit?!
E pamundur, ai i kishte vendosur Bashës në të gjitha anët dopjo rreth, madje njerëzit e tij. Kurdo t`i duhej që të jepte idenë e “liderit suprem” t`i merrte pas dhe të përçonte në opinion, se Basha u la vetëm dhe Berishën e ndjekin nga pas. Çfarë dua të them?
Ankimet dhe mospëlqimet për sistemin elektoral proporcional kanë një emërues të përbashkët; ”sistem zgjedhor që çimenton kryetarokracinë”. Nëse kjo ka një të vërtetë, e nëse Basha nuk mund të konsiderohet aq naiv politikisht, se ndryshe Berisha nuk do e qarkullonte në qeverinë e tij, sa në një ministri në tjetrën dhe nuk do e mbështeste si pasuesin e tij në parti, natyrshëm lind një pyetje:
Nëse Berisha vërtet nuk ka pasur veto, si mundet që një “kryetarokrati” si Basha i ikën te Berisha drejtuesit e listës së deputetëve në Vlorë, Durrës, Gjirokastër, Tiranë, Lezhë, Shkodër e Dibër?!
Edhe shumica e atyre që me propozim të Lulzim Bashës u kandiduan dhe u bënë anëtarë kryesie të PD pas zgjedhjeve të 25 prillit, e braktisën “folenë” dhe shkuan te “babai non grata”. Më thoni dot si e pse?!
Berisha kishte të planifikuar në detaj çdo skenar. Madje ai kishte filluar të “godiste ” figurën e Bashës, pasi nuk i duhej në asnjë moment fuqizimi i tij. Nuk i duhej fitorja e 25 prillit, pasi rrezikonte të shkuarën e të tashmen, jo vetëm të tij por i rrezikohej edhe Metaj i shallit të kuq të komunizmit.
