Ilir ALLKJA, mjek
Si mjek, si qytetar jam çdo ditë mes njerzve, dhe ajo që më dhemb fort është varfëria migjeniane me të cilën përballen familjet e zakonshme në Tiranë, e pa dyshim dhe në mbarë Shqipërinë.
Pensionistët që vizitoj unë, janë përballë një zgjedhjeje të ashpër mes me ilaçeve për zemrën, tensionin, diabetin apo vezës e bukës në tavolinën e tyre. Agrumet, frutat e stinës janë “mollë e ndaluar” tashmë për ta.
Dikush nga ju do të tundë kartën e “shëndetësisë falas” e dikush tjetër deklaratën e ministrit Ahmetaj ndërsa del nga vetura e tij luksoze, se gjoja varfëria në Shqipëri qenka më e ulëta në raport me Evropën e botën mbarë, por e vërteta është ajo që ndodh brenda mureve të shtëpive të zakonshme të Tiranës, propaganda e ka shtëpinë tek pushtetarët.
Megjithatë ti lëmë ndjesitë personale, t’ju referohemi statistikave dhe për të qenë objektivë le të lexojmë Eurostat, si më të besueshmet në Evropë.
Ndryshe nga raportet e qeverisë socialiste Eurostat deklaron se 51% e shqiptarëve janë në rrezik varfërie, dhe më e rënda në përjashtim social.
Janë më shumë se gjysma e familjeve shqiptare që nuk po ushqehen minimalisht, nuk po çojnë dot fëmijët në shkollat e mesme e universitete për shkak të pamundësisë ekonomike.
Për veshje ka arna e rroba gabi plot, ndërsa për jetë sociale e kulturore as bëhet fjalë.
Numri i të miturve e te rinjve që po ikin çdo ditë nga Shqipëria është frikshëm i lartë, dhe këta nuk ikin nga Shqipëria për një jetë më të mirë, jo, zotërinj! Këta ikin sepse në Shqipëri nuk kanë asnjë mjet jetese.
Ndryshe nga cfarë kanë emigruar më parë, sipas Eurostat në Shqipëri ka një fenomen të dhimbshëm, po emigrojnë edhe 40-50 vjeçarët, të cilët ndryshe nga të rinjtë ikin nga vendi i tyre për të mos u kthyer më kurrë.
Janë edhe mijëra shqiptarë që nuk gjejnë dot rrugët e mërgimit pasi nuk kanë as minimumin e parave për udhëtim, dhe këto herët a vonë kthehen nga dëshpërimi në kontigjene kriminale, nga të cilët rrezikohemi të gjithë, pa asnjë dallim.
Miq, kjo është Shqipëria e ministrave me Bentley dhe votuesve me barkun bosh.