Lodovik HASANI, ish-kandidat i PD, Pukë
Të dashur, vëllezërit dhe motrat e mi pukjanë!
Para ca ditësh nisi punimet Kuvendi i ri i Republikës së Shqipërisë, duke shënuar kështu për disa legjislatura radhazi mungesën e përfaqësuesve pukjanë, të cilët pavarësisht bindjes politike, do të ishin zëri i halleve dhe problemeve të shumta të këtij komuniteti fisnik.
Puka, si një trevë me një potencial njerëzor të admirueshëm, që ka nxjerrë intelektualë të fushave të ndryshme, djem dhe vajza të përkushtuara në afirmimin e vlerave profesionale dhe humane, sot, ndjehet e papërfaqësuar, pasi qasja e votuesve pukjanë në raport me sistemin dhe truket e tij, është në papërthueshmëri të plotë, duke bërë që zgjedhësit të orientohen “gabimisht“ dhe duke lënë të paparfaqësuar veten e tyre.
Kjo mungesë e përfaqësuesve pukjanë në tempullin e demokracisë prej disa legjislaturash, sigurisht që ka sjellë dhe pasojat e saj, duke bërë që Puka të mos dëgjohet dhe të mos trajtohet asnjë problematikë që i adresohet këtij komuniteti me halle të mëdha dhe probleme të shumta.
“I Zoti e di ku i pikon catia“, ndaj dhe askush më mirë se pukjanët, pavarësisht siglës partiake, nuk do ngrenë në asnjë kohë shqetësimin real të banorëve të kësaj treve, ndër më të varfrat në vend.
Të vjen keq, që gjithnjë jemi shndërruar në hambar votash për të tjerët, ndërkohë që pas zgjedhjeve, kemi vulën e braktisjes së madhe.
Të dashur vëllezërit dhe motrat e mi!
Zgjedhjet e 25 prillit, që kulmuan me këtë fenomen, duke mohuar veten tonë dhe duke i dhënë zë kulturës së tjetërsimit të përfaqësimit, le të jenë një këmbanë zgjimi për legjislaturat e ardhshme, ku zgjedhësit pukjanë të mos davariten dhe të shkërmoqen në vota pa domëthënie reale përfaqësimi, vetëm e vetëm për të përmbushur oreksin e shefave apo dhe të matrapazëve dhe pazarxhinjve të votave, por t’i japin sens dhe vlerë vullnetit të tyre, duke u ngritur në stadin e një shoqërie të civilizuar dhe të përgjegjshme për përfaqësuesit e vet.
Përzemërsisht, Lodovik HASANI