Nga Paulin Marku, anëtar i Këshillit Kombëtar PDSH-së
Kush duhet ta bëjë rithemelimin politik?
Historikisht ne shqiptarët e kemi parë zgjidhjen e problemeve tona jashtë nesh, të tjerët kanë qenë ata që duhet të na shpëtonin,mësonin,urdhëronin e zgjidhnin problemet tona të vazhdueshme politike. Gjatë këtyre 30-viteve ndërkombëtarët kanë qenë zgjidhja jonë e vetme dhe e përhershme politike. Në fakt rithemelimin e qenësishëm dhe të vërtetë duhet ta bëjmë vetë ne shqiptarët.
Kjo realizohet në dy forma:
1.Njëra formë është përmes rithemelimit të individit, i cili në fakt është një proces i gjatë dhe kërkon durimin e angazhimin e të gjithë sistemit arsimor, familjar dhe fetar të shoqërisë shqiptare.
2.Ndërsa forma tjetër është rithemelim përmes elitave dhe klasës intelektuale të vendit.
Kjo e fundit, është forma më e shpejtë por me kosto më të mëdha dështimi, për shkak se elitat e vendit,sot janë në një masë të konsiderueshme pjesë e vetë problemit për shkak të kapjes së tyre intelektuale nga mijëra fije dhe trafiqe interesi.
Rithemelimi përmes elitave, kërkon që një grup intelektualësh të vetëdijshëm dhe të ndershëm të dalin mbi interest personale dhe të fillojnë të bëjnë ndryshimin. 3.Ka edhe një rrugë të tretë që është rithemelimi i shoqërisë tonë nga faktorë të jashtëm. Është pikërisht kjo që po ndodh me reformën në drejtësi.
Faktorë të jashtëm, duke parë dështimin e individit dhe elitave shqiptare për ta rithemeluar veten dhe shoqërinë e tyre, kanë filluar procesin e rithemelimit të shoqërisë shqiptare përmes formave të ndëshkimit të ligjit bazuar në reformën në sistemin e drejtësisë dhe atë antikorrupsion.
Kjo formë e rithemelimit bazuar mbi ndëshkimin, është një formë e shpejtë dhe efikase duke eliminuar të korruptuarit brenda shoqërisë dhe duke i lënë vendin të tjerëve më shpresë që këta ta bëjnë rithemelimin.
Metoda e faktorit të jashtëm është e shpejtë por jo e natyrshme, ndëshkimi do sjellë përmirësime të përkohshme, por me kalimin e kohës ka rrezik që sistemi të rikthehet aty ku ishte në ngrehinën e vjetër, nëse rithemelimi i jashtëm nuk do të shoqërohet me rithemelimin shpirtëror dhe etik të shoqërisë. Rithemelimi nuk është akt teorik ,por kërkon qëndrueshmëri dhe vendosmëri politike dhe intelektuale!
