“Angazhimi im, është dhe do të jetë në funksion të bashkimit të të gjithë demokratëve dhe qytetarëve të ndershëm, për të krijuar maxhorancën morale dhe numerike, si dhe për të përmbysur njëherë e përgjithmonë këtë sistem antivlerash të krijuar për interesa të ngushta ekonomike, por që mban peng banorët e trevës së Pukës dhe që pamundëson vizionin zhvillimor të saj”, me këtë mesaz iu është drejtuar banorëve të bashkive Pukë dhe Fushë-Arrëz, ish-kandidati për deputet Lodovik Hasani, i cili edhe pse nuk arriti të sigurojë mandatin për në Kuvendin e Shqipërisë, ka zhvilluar një fushatë impresionuese duke marrë një rezultat të kënaqshëm, pasi përballë kishte makinerinë e pushtetit lokal dhe qendror, si dhe falangat e krimit të organizuar.
Z.Hasani, ka njoftuar strukturat e degës lokale dhe mbështetësit e tij se nuk do të heqë dorë nga beteja për t’i siguruar zgjedhësve pukjanë votën e lirë, dhe përmes turit të takimeve, do komunikojë vazhdimisht me qytetarët duke shpalosur strategjinë e arritjes së këtij qëllimi.
Mesazhi i plotë:
Vëllezërit e mi pukjanë!
Me besimin se asgjë nuk e ndal triumfin e demokracisë dhe të vlerave të saj, si dhe me vullnetin tim të palëkundur për të vijuar misionin e mbrojtjes së votës së lirë dhe të verdiktit tuaj, që prej 8 vitesh devijohet në mënyrë sistematike dhe përcaktohet nga struktura të botës kriminale, do vazhdoj të jem një zë i fuqishëm i juaji, pavarësisht qënies sime jashtë Kuvendit të Shqipërisë.
Në vijim të këtij misioni, premtoj se do të jem gjithnjë dhe kurdoherë pranë jush, pasi vlerat dhe dinjitetin tuaj, nuk mundet askush t’i nëpërkmbë për qëllime të oligarkëve dhe të banditëve “ pa din e pa imam“ që vërtiten nëpër zonë si komitë duke njollosur imazhin e trevës sonë fisnike.
Angazhimi im, është dhe do të jetë në funksion të bashkimit të të gjithë demokratëve dhe qytetarëve të ndershëm, për të krijuar maxhorancën morale dhe numerike, si dhe për të përmbysur njëherë e përgjithmonë këtë sistem antivlerash të krijuar për interesa të ngushta ekonomike, por që mban peng banorët e trevës së Pukës dhe që pamundëson vizionin zhvillimor të saj.
Që dje, kam filluar turin e takimeve me drejtues të strukturave të bashkive Pukë dhe Fushë-Arrëz, me të cilët kam ndarë mendime dhe diskutime të ndryshme, me qëllim përpilimin e një strategjie që synon komunikimin kapilar dhe permanent me banorët, si dhe mbajtjen në koherencë të strukturave të PD, ndaj të cilave unë shpreh gjithë vlerësimin tim maksimal.
Do të jem i pranishëm herë pas here, në Pukë dhe në Fushë-Arrëz, për të dëgjuar dhë për të bashkëbiseduar intensivisht me ju për cdo problematikë, ndaj u ftoj të vijojmë këtë rrugë sëbashku, pasi unë, nuk do tërhiqem nga misioni për të qenë zëri juaj! Bashkërisht, do mundim “komitët e natës“ dhe do i rikthejmë dinjitetin trevës sonë duke afirmuar një sistem përfaqësimi në cdo hallkë pushteti, përmes votës së lirë. Bashkërisht, nuk do lejojmë të devijohet vullneti i zgjedhësve pukjanë!
Mirënjohje për të gjithë ju !
Lodovik Hasani