“Optimizmi është besimi që të çon në arritje. Asgjë nuk mund të bëhet pa shpresë dhe vetbesim“.
Kjo thënie e Helen Keller, përshkruan më së miri personazhin e rubrikës sonë, e cila është një femër që pozitivitetin dhe energjinë e saj, e ka kthyer në burim sfidash jetësore, duke u afirmuar si një etalon kurajoje dhe guximi për forcën dhe vizionin që ajo paraqet në sipërmarrjet e saj.
Është 28 vjeç, dhe në qytetin e Elbasanit, pakkush mund të mos e njohë apo të mos ketë dëgjuar emrin e Marinela Hysajt. E diplomuar me rezultate të shkëlqyera për psikologji edukimi, në universitetin “Aleksander Xhuvani”, Marinela, nuk ka hequr dorë kurrë nga pasioni i saj i hershëm, fitnesi, me të cilin qytetarët e identifikojnë më së shumti “Marinela e fitnesit”, dhe pak e dinë se ajo është një psikologe edukimi, me një background profesional të admirueshëm.
Para pak vitesh, në vendlindjen e saj, krahas studimeve, ajo gjeti kohë të hapte një biznes të sajin, një qendër fitnesi, duke arritur të materializojë ëndrrën dhe ta kthejë në realitet, gjë që dëshmon për karakterin energjik dhe këmbënguljen titanike si dy nga cilsitë më tipizuese të Marinelës.
E aftë të kthejë në favorin e saj cdo situatë, psikologia Marinela Hysa, me stilin komunikativ dhe gjestikulacionin impresionues, të imponohet në biseda të clirta, dhe në fund të bën terapinë e mendjes, duke të të dhënë pozitivitetin dhe energjizmin e saj të pashterur.
Me sytë që i shkëlqejnë dhe i reflektojnë një botë të kristaltë shpirtërore, Marinela, spikat për mendimin e lirë, të cilin e artikulon buzagazshëm dhe që e shoqëron me vështrimin sensual, duke marrë një qëndrim pozant gati-gati sfidues.
Prej shumë vitesh si instruktore fitnesi në qytetin e Elbasanit, ka krijuar një reputacion dhe admirim të madh, pasi qendra që ajo kishte hapur ishte një pikëtakim brezash dhe personalitetesh, që me Marinelën kishin krijuar simbiozë që aq bukur gërshetohej.
Vitet ecin dhe Marinela, tashmë e maturuar profesionalisht, ka filluar të ecë në gjurmët e profesionit, dhe ajo sot është pjesë e një korpusi të madh shoqatash, me fokus edukimin dhe psikologjinë moshore, me të cilat ka një bashkëpunim serioz dhe profesional.
E pyetur nga redaksia jonë për pasionin e saj, fitnesin, ajo do të shprehej: Në planet e mia të afërta, qëndron akoma idea për të riahpur një qendër fitnesi, por kësaj radhe me një pikësynim dhe objektiv më të qartë, prandaj dhe po bëj përgatitjet e duhura, që lidhen me infrastrukurën e domosdoshme dhe me akomodimin e përshtatshëm.
Marinela, së fundmi ka zgjedhur të jetojë në kryeqytet dhe sot ajo është aktiviste e shoqërisë civile, ku ka ngritur zërin e saj demonstrativ në mbrojtje të shumë kauzave dhe është dalluar për konsekuencën e mendimit dhe koherencën e qëndrimeve të saj.
