Të gjithë jemi përfshirë në debatin mbi listat e hapura dhe përpiqemi të argumentojmë avantazhet dhe dizavantazhet e tyre.
Ajo çka vihet re është fakti se askush nuk diskuton për listat e mbyllura dhe avantazhet e tyre për vetë faktin se ato lloj listash nuk kanë asnjë lloj avantazhi publik,por kane sigurisht avantazh per kryetarët e partive që të mbajnë në kontroll bashkëpunëtorët e vet si dhe për disa elemente rreth tyre të cilët,përmes listave të mbyllura mund të kishin një vend të sigurt në kuvend,përmes konçesioneve apo pazareve,pavarësisht preferencave te zgjedhesve.
Sa i perket argumentave qe me lista të hapura mund të hyjnë njerëz në parlament përmes parasë së pistë,rrëzohet sepse kjo mund të ndodhe vetëm nëse dikush riskon të garojë si i pavarur. Në të gjitha rastet e tjera janë kryetarët e partive qe përpilojnë listat (pa paracaktuar fituesit) dhe janë ata që kanë përgjegjësinë që brënda listave të kete njerëz me integritet dhe publikisht të respektuar që të mund të tërheqin votuesin.
Pra,i ben kryetarët më të përgjegjshëm për përzgjedhjen sepse nuk dinë kush do të votohen më shumë.Sa i takon njerëzve me reorde kriminale është vetë ligji i dekriminalizimit që i mban larg të qënit kandidatë.Sigurisht që asgjë nuk është ideale,edhe kjo mënyrë votimi do të ketë problemet e veta,por me siguri absolute do të ketë një përfaqësim më dinjitoz.
Duke dashur të jem edhe pak cinik,më vjen mirë që disa figura inflacioniste të tranzicionit nuk do të munden dot të kene një mandat të sigurt. Ata ose do të duhet të tërhiqen,ose do të duhet të luftojnë fort për të bindur njerëzit që t’i votojnë.
Mrekullitë nuk ndodhin aq shpejt,sidomos në këtë vend,por kur pushteti i kalohet realisht zgjedhësve është hapi i parë dhe i duhur drejt demokratizimit të vetë forcave politike e më pas edhe i krejt shoqërisë.Unë uroj shumë që propozimi i Bashës të materializohet dhe të mos shëndërrohet në një surrogato përqindjesh që i lenë vendimmarrjen miletit për pjesën e poshtme të listës e ja marrin kryetarët kreun e saj,praktikisht shumicën e mandateve.
Shpresoj që kjo të mos jetë në sofrën e negociatave dhe të bëhet pazar me të,por të ruhet dhe të mbrohet fort nga PD si një parim mbi të cilin do të duhet të ngrihen të tjera parime demokracie,aq shumë të dëshiruara,por fatkeqësisht të munguara në arenën politike shqiptare.
