Nga Elona CASLLI
Komunistët janë gjithmonë në harmoni me njëri-tjetrin. Kanë një bashkëveprim aq të përsosur, sa do ta kishte zili edhe një matematicien. Bashkëveprojnë kudo.
Bashkëveprojnë në jetë, në punë, në dashuri dhe madje edhe në martesë. Gjithçka e llogarisin komunistët. Janë të përpiktë në çdo veprim. Mbiemri i familjes luan një rol kyç tek komunistët. Sa më i lidhur të jetë ky mbiemër me të shkuarën e lavdishme të partisë, aq më të mëdha do të jenë privilegjet.
Partia nuk harron kurrë t’i shpërblejë bijtë e saj besnikë, madje edhe nipërit e bijve. Kurdo dhe kudo fjalëkalimi i vetëm, mbetet gjithmonë mbiemri i familjes. Nëse do t’i qëmtosh me kujdes bisedat e komunistëve do të vesh re, që fjalia hyrëse në fjalinë e tyre është: Kemi të birin e filanit; është mbesa e filanit; etj. Nuk flitet për biografi profesionale, por për biografi familjare.
Pra, komunistët nuk heqin dorë nga biografitë. Duan gjithmonë të kenë një mbështetje kudo. Ndaj i sheh të shpërndarë si kërpudhat pas shiut në institucione të ndryshme brenda dhe jashtë vendit. Duhet t’i gjenden pranë njëri-tjetrit dhe ta mbrojnë njëri-tjetrin. Organizata duhet të qëndrojë në këmbë. Vëllazëria nuk duhet të shuhet…
Post Scriptum- Komunistët bashkëtingëllojnë gjithmonë me njëri-tjetrin….
