Nga Red Varaku
Presidenti Ilir Meta, bazuar në të drejtën që i jep kushtetuta e Republikës së Shqipërisë, bëri një interpretim të tijin të krizës politike, në funksion të zgjidhjes së krizës së rëndë ku ndodhet vendi, për të evituar një përplasje civile në 30 qershor.
Kryeminstri Edi Rama sigurisht që ka mendimin e tij në lidhje me krizën dhe kjo është e drejta e tij, siç është vetëm e drejta e tij legjitime ta interpretojë atë.
Deri këtu nuk ka asgjë për tu keqkuptuar.
Nëse Edi Rama nuk është dakort me vendimin e presidentit Meta, ai duhet ta ankimojë këtë vendim në Gjykatën Kushtetuese, që për fat të keq nuk egziston.
Në mungesë të Gjykatës Kushtetuese atij i ka mbetur vetëm një zgjidhje: shkarkimi i presidentit Ilir Meta. Por, për këtë do t’i duhen më shumë se dy të tretat e parlamentit.
Nëse arrin ta shkarkojë brenda afateve, ai mund të shkojë i qetë drejt zgjedhjeve, sepse është brenda shinave të ligjshmërisë.
Nëse vendos të shkojë drejt zgjedhjeve në rrugë tjetër, dmth duke shkelur dekretin e presidentit, ai ka kaluar në anën e paligjshmërisë, dhe për këtë do të ketë kundër të gjithë faktorët, përfshi edhe ata pak ndërkombëtarë që e mbështesin.
Per të zgjidhur këtë krizë kushtetuese beteja do të zhvillohet në parlament. Shpresojmë që faktorët e përgjegjshëm brenda mazhorancës dhe jashtë saj ta bllokojnë këtë nismë që mund të sjellë pasoja të parikuperueshme për vendin.
