Vazhdon puna intensive e Bashkisë Fushë-Arrëz për menaxhimin e situatës së krijuar nga reshjet e shumta të dëborës, të cilat në pjesën më të madhe të territorit të kësaj bashkie kanë kaluar trashësinë e 1.2 m.
Ashtu si në të gjithë vendin, reshjet e dy ditëve të fundit kanë sjellë problematika të shumta në disa njësi administrative të kësaj bashkie, kryesisht në bllokim të rrugëve dhe në mbajtjen hapur të akseve të tjera rrugore.
Kryetari i bashkisë Fran Tuci, po menaxhon situatën duke qenë në terren, si dhe duke mbajtur në koordinim grupet e punës të ngrituara, të cilat raportojnë mbi çdo problematikë që shfaqet si rezultat i situatës së krijuar.
Ndërkohë borëpastrueset dhe mjetet e tjera të bashkisë kanë qenë në gatishmëri gjatë gjithë natës dhe gjatë ditës së sotme për të pastruar rrugët dhe duke mundësuar qarkullimin normal të automjeteve.
Problematike shfaqet situata në njësinë administrative të Iballës, e cila përpos ndërhyrjeve të disahershme të borëpastrueseve të bashkisë, sërish gjendet e izoluar. Segmenti rrugor që lidh këtë njësi administrative me qendrën e qytetit të Fushë-Arrëzit, përshkohet nga një terren tërësisht malor, i cili nën ndikimin e erërave të fuqishme që e rrahin, ka të grumbulluar vende-vende një trashësi dëbore deri në 2 metra.
Nga ana tjetër, shtabi i emergjencave civile pranë Bashkisë Fushë-Arrëz po ndjek çdo problematikë në terren, duke siguruar një kontroll të plotë të territorit si dhe një mirëmenaxhim të situatës.
Me urdhër të posaçëm të kryetarit Tuci, punonjësit e shërbimeve të bashkisë kanë ndërhyrë në çdo pjesë të qytetit, duke bëtë të mundur pastrimin e dëborës, si dhe duke lehtësuar për qytetarët dhe njësitë tregtare qarkullimin normal të veprimtarisë së tyre.
Duhet theksuar roli dhe impenjimi i të gjithë stafit të bashkisë, në mirëmenaxhimin e deritanishëm të situatës, të cilët nën drejtimin e kryetarit Fran Tuci, kanë arritur të sigurojnë automjetet e duhuara, duke mbajtur të qarkullueshme segmentet rrugore dhe duke siguruar ofrimin e shërbimeve ndaj banorëve në një kohë relativisht të shpejtë.
Kjo bashki ka vuajtur gjithnjë problematikën e izolimit të saj nga reshjet e dëborës, por falë mirëmenaxhimit që administrata aktuale dhe kryetari Fran Tuci i kanë bërë fondeve publike dhe qasjes ndaj një vizioni që i shërben interesave të qytetarëve, ajo sot është institucioni që ka fituar besimin dhe vlerësimin e qytetarëve të saj.
