Mesazh urimi, drejtuar NTM Princ Leka II, me rasin e 96-vjetorit të Shpalljes së Mbretërisë🇦🇱
I nderuar Lartësia Juaj Princ Leka II,
Me rastin e kësaj date të shënuar historike kombëtare, kam nderin dhe kënaqësinë që në emrin tim personal dhe në emër të Partisë Lëvizja e Legalitetit, t’ju uroj Gëzuar Ditën e Shpalljes së Mbretërisë Shqiptare.
Për të gjithë ne, kjo është një ditë e veçantë, një ditë që mbush me krenari çdo shqiptar dhe na kujton një periudhë të lavdishme që kombi ynë ka kaluar! Kjo ditë është një simbol i krenarisë kombëtare, pasi Shqipëria u radhit historikisht dhe ligjërisht si një shtet me rend kushtetues mbretëror, ashtu si shumë shtete të tjera europiane dhe perëndimore.
Çdo legalist mbetet i bindur se ka ardhur momenti që Shqipëria të qeveriset sipas një Filozofie Zogiste, me një sistem qeverisës Mbretëror. Për këtë arsye, ne mbetemi këmbëngulës dhe të sigurt se kjo ditë do të vijë së shpejti.
Familja Mbretërore përfaqëson dhe mbetet një aset kombëtar me një status të veçantë parlamentar, ndërsa Ju jeni shpresa për ta bërë vendin tonë ashtu siç duhet, duke u ulur në Fronin Mbretëror.
Janë këto vlera të trashëgueshme që Ju mbartni, arsyeja për çdo tentativë sulmi denigrues ndaj figurës suaj, gjithmonë me prapavijë politike dhe frikë nga mbështetja popullore që gjithnjë e më shumë po rritet.
Nëpërmjet këtij mesazhi, urojmë që me besim në Zot, punë dhe dëshirë të të gjithë shqiptarëve, kauza jonë e përbashkët për rikthimin e Mbretërisë Shqiptare të bëhet sa më shpejt realitet.
Zoti ju bekoftë Ju dhe Familjen Mbretërore Shqiptare! 🇦🇱
Me respekt dhe konsideratë,
Shpëtim Axhami
Kryetar i Partisë Lëvizja e Legalitetit të Shqipërisë.