Vrau gjyshin, nipi tenton të inskenojë ngjarjen si grabitje, por në fund pranon krimin.
Vangjel Kapllani, i njohur dhe me emrin Anxhelo, ka pranuar para hetuesve se është pikërisht ai autori që ka vrarë me një plumb pistolete në kokë, gjyshin e tij 69-vjeçar. Adoleshenti 16 vjeç kishte trashëguar pikërisht emrin e gjyshit, i cili e kish rritur prej moshës 2 vjeç, pasi në vitin 2004 dy prindërit e tij vdiqën në një aksident rrugor në Greqi.
Hetuesit kanë arritur të binden se gjithçka mund të ishte vrasje dhe se autori mund të ishte nipi i tij. Këtë bindje ata e kanë krijuar nga ekspertiza e vdekjes së 69- vjeçarit, por edhe nga deklaratat kontradiktore të nipit të viktimës mbi rrethanat e ngjarjes. Kjo ka bërë që në orën 04:00 të së enjtes, 16- vjeçari Vangjel Kapllani të arrestohet.
Adoleshenti para hetuesve ka pranuar se ishte pikërisht ai vrasësi i gjyshit të tij. Nipi i viktimës ka treguar se ka qëlluar 69- vjeçarin me plumb në kokë, me një pistoletë “Zastava”, të cilën ua kishte blerë disa të rinjve në Vlorë, pasi gjyshi i kishte “nxirë jetën pas vdekjes së gjyshes”.
Kapllani, pasi ka parë që gjyshi nuk kishte vdekur ende, e ka goditur dhe me një send të fortë pas koke. “Policia e Vlorës, pas hetimeve intensive ka bërë zbardhjen e gjithë mekanizmit të ngjarjes. Rezulton se autori i dyshuar i krimit të jetë nipi i të moshuarit, V.K., 17 vjeç, i cili do të përballet penalisht për veprën penale ‘Vrasje për shkak të marrëdhënieve familjare’”, bëhet e ditur nga Policia.
Dyshohet sipas informacioneve nga Policia dhe asaj çfarë ka dëshmuar 16-vjeçari, se ky i fundit ka tentuar të marrë shumën prej rreth 1 milion lekësh të vjetra dhe në ato momente është pikasur nga i moshuari, gjë e cila ka shkaktuar debat mes tyre. Sipas Policisë, gjatë sherrit 16-vjeçarit e ka qëlluar me pistoletë dhe më pas me send të fortë pas koke, që dyshohet se është qyta e pistoletës. Pas kësaj është përpjekur që të inskenojë se e gjitha kishte ndodhur pas një grabitjeje.
Policia ka sekuestruar edhe armën e krimit, të cilën 16-vjeçari e kishte hedhur në një pusetë pranë banesës, pak pas krimit. Adoleshenti jetonte prej vitit 2004 me gjyshërit nga ana e babait, pas një aksidenti të rëndë rrugor ku kishin ndërruar jetë dy prindërit e tij në Greqi.
Prej moshës 2 vjeç, Vangjel Kapllani ishte rritur nga gjyshërit, ndërsa rreth tre muaj më parë ishte ndarë nga jeta edhe gjyshja e tij, bashkëshortja e viktimës, Marie Kapllani.
