Zgjedhjet vendore renditën Partinë Socialiste të parën duke fituar deri tani 50 bashki, ndërsa koalicioni “Bashkë Fitojmë” mori 7 bashki të vendit duke u renditur forcë e dytë.
Katër gra do të drejtojnë 4 bashkitë e vendit, në Lushnjë, Bulqizë, Kurbin dhe Durrës. Eriselda Sefa, Festime Mjeshtri, Majlinda Cara dhe Emiriana Sako janë drejtueset e ardhshme të qeverisjeve vendore.
ERISELDA SEFA
Në zgjedhjet e pjesshme të 6 marsit, Eriselda Sefa u zgjodh në krye të Bashkisë së Lushnjës. Sefa mori votëbesimin e partisë dhe të strukturave me të cilët bashkëvepronin.
Lushnja ishte e vetmja bashki ku emri i kandidatit u shty pasi kaloi në balotazh me Krenar Haxhiun.
Më 14 maj, Sefa mori mandatin e plotë të kryetarës së Bashkisë Lushnjë. Ajo grumbulloi 22453 vota përballë kundërshtarit të “Bashkë Fitojmë”, Eduart Sharka i cili grumbulloi në total 13393 vota.
KAS gjobiti me 100 mijë lekë Eriselda Sefën pasi akuzohej për shkelje administrative në kuadër të fushatës zgjedhore të 6 marsit.
FESTIME MJESHTRI
Festime Mjeshtri fitoi Bashkinë e Bulqizës me 8364 vota. Mjeshtri ka qenë e angazhuar prej vitesh në politikë në qarkun e Dibrës. Mjeshtri ka punuar edhe në institucione shëndetësore, si pjesë e promocionit shëndetësor, e angazhuar me të gjitha gratë në luftën kundër dhunës në familje, kancerit të gjirit, diabetit, drogës, duhanit.
Festime Mjeshtri ka punuar si mësuese e jashtme në profilin Infermieri, akualisht drejtoreshë në spitalin e Bulqizës.
MAJLINDA CARA
Në vitin 2019 Majlinda Cara mori drejtimin e Bashkisë së Kurbinit. 14 maji i dha Carës mandatin e dytë në këtë bashki.
Karriera e Carës si kryebashkiaku do të ‘lëkundej’ nga tërmeti i 26 Nëntor 2019 kur u vu në pikëpyetje detyra e bashkisë në shpërndarjen e banesave për të prekurit nga tërmeti shkatërrues.
Asokohe, banorët e Kurbinit denoncuan Carën se nuk iu kishte dorëzuar ende çelësat e banesave të rindërtuara pas tërmetit, edhe pse kishin kaluar rreth 20 ditë nga inagurimi i tyre.
Cara justifikoi vonesën e dorëzimit të çelësave me argumentin se procedurat duhet të kalonin fillimisht nga Këshilli i Ministrave.
EMIRIANA SAKO
Sako u duk se ishte e preferuara e Ramës në zgjedhjet e 14 majit, pasi edhe mbylljen e fushatës për PS-në e bëri nga Durrësi. Lidhjet e Ramës me Durrësin sigurisht që janë të forta duke marrë shembull projektin e Portit të Durrësit miliona euro që do të investohet nga biznesmeni arab Alabbar.
Sako e mori detyrën e kryebashkiakes që në vitin 2019, kur pasoi Vangjush Dakon.
Opozita e ka denoncuar si të përfshirë në aferën e inceneratorëve, pasi Emiriana Sako i dha kompanisë së Klodian Zotos 10 milionë euro nga buxheti i bashkisë që drejton.
Në fillim të vitit 2022, Sako shpalli gjendjen e emergjencës për shkak të grumbullimit të plehrave. Pa tender, por me negocim, i dha kompanisë së inceneratorit të Tiranës 25 milionë euro, 15 prej të cilave vetëm për transportin. Sako ishte dëshmitare edhe në Komisionin Hetimor për Inceneratorët ku mohoi akuzat për aferën e inceneratorëve.
