Nga Edison YPI
Të dashur bashkatdhetarë atdhebraktisës, vllavrasës, kafepirës, gazetangrënës, internetshetitës, hashishtymosës, zemërbardhë, mëlçizinj, shpirtkatranë, ku jeni e ku s’jeni para tavave të dhesë, zjarreve të ftohura, vatrave të fikura, oxhakëve pa tym, ndalni llomotitjet, thashethemet, intrigat, dallaveret, kollitjet, teshtitjet, frymat, dhe zgjatni veshët;
– Po japim lajmet !
Sipas të dhënave për vërtetësinë e të cilave nuk mbajmë përgjegjësi, j’u dha përgjigje kryepyetjes që prej shekujsh torturon kryemendjet e shqiptarëve, europianëve, amerikanëve, kinezëve, japonezëve, dhe banorëve të mbarë planetit; Pse shqiptarët vrasin njëritjetrin ?
Ky fenomen ka ndodhur, po ndodh dhe do ndodhi, jo për shkak të selektimit natyral darvinian, as për arësye politike, ideologjike, etj, por sepse mbi truallin e pellazgëve, mpleksja e gravitacioni të tokës me rrezet kozmike, fushat elektromagnetike të mineraleve, plus flladin e pranverës, trishtimin e lunës, muzgun dëshpërues, perëndimin e përgjakur, të gjitha këto pra, mpleksen në atë mënyrë që mendjen e shqiptarit e torollepsin aq tepër dhe aq bukur saqë për shkak të këtij turbullimi të pavetdijshëm, duke ngatërruar lugën që fut në pjatë me sqeparin që ngul në kurrizin e babait, apo pirunin që ngul në sallatë me thikën në zemrën e vëllait, s’di ç’katranos, s’di ç’ther, s’di ç’vret.
Pyetja tjetër; Pse në disa vende të Shqipërisë lopët lindin viça me 3 koka të shtrembëra, gjarpëreshat pjellin gjarpërinj me 5 gjuhë të helmatisura, pulat nxjerrin nga bytha vezë të bardha pa asnjë të verdhë brenda ?
Siç na njofton blogu Nampanam pik hiçi, u zbulua se shkaku i kësaj mënxyre ndodhet në katundin Varilesht të Komunës Moserruj ku femrat kanë nga jo më pak se 7 vrima. Hutimi i meshkujve para gjithatyre vrimave është arësyeja e atij ndërlikimi genetik monstruz.
Pyetjen tjetër; Në cilin zgëq të Shqipërisë flitet dhe shkruhet gjuha e pastër shqipe ? e sqaron portali futjakot pik pordhi nga i cili mësojmë se ai zgëq ndodhet ku askush nuk e di, askujt nuk i vlen, kurrkujt nuk i intereson, për askend nuk ka rëndësi. Nëse zgëqi në fjalë ekziston sepse nuk ka asnjë rëndësi, apo duke mos pasur asnjë rëndësi s’dihet nëse ekziston, pritet ta qartësojë Fiqir Firifiu në programin e tij televiziv “Sofra e Rrotave” ku llomotitet pafund për këto dhe të tjera tema të tilla.
Ku ndodhet katundi Liria ? Ai pa Kushtetutë, pa Parlament, pa qeveri, pa ligje, pa Kod Penal pa prokurori, pa gjykatë, si dhe natyrisht pa pare, pa korrupsion, me bakshish zero, me taksa inekzistente, korent dhe ujë që nuk paguhen sado të konsumosh.
Dilemën për pyetjen madhore për fatet e Kombit lidhur me vendndodhjen e atij katundi e zbardhi sajti i Tarallak Biçimsëzit, i cili, për katundin në fjalë jep këto koordinata; Katundi Liria ndodhet prapa maleve, në luginën e lumit, pranë kaçubeve, përballë ujvarës, rrëzë pellgut me ujë të ndënjur ku guakin zhabat, pickojnë mickonjat, kafshojnë gaforret, helmojnë gjarpërinjtë. Për fat të keq, këtë katund nuk e kap asnjë hartë. Për fat të zi nuk e njeh asnjë administratë. Për fat të sterrosur nuk mund ta shohi asnjë njeri normal. Por s’është për tu mërzitur. Katundin Liria mund ta nuhasi, shohi, vizitojë, madje dhe mund ta blejë dhe shesi, cilido shqiptar me gjak të prishur, tru të munguar, mendim të avulluar, farefis me cubin Kuqo Thika, banditin Hajn Koburja, killerin Gurrmaz Brisku.
Dhamë lajmet.
Faleminderit për vëmendjen e munguar. Vëmëndjet e tjera e dini vet ju për çfarë i përdorni.
